‘महागोयबल्स’ शैली हावी भएको ओलीको टिप्पणी, सत्यभन्दा झूटको प्रचार बढेको दाबी

काठमाडौं । नेकपा (एमाले) का अध्यक्ष केपी शर्मा ओलीले वर्तमान समाजमा झूटलाई सत्यका रूपमा स्थापित गर्ने प्रवृत्ति बढ्दै गएको भन्दै त्यसलाई ‘महागोयबल्स’ शैलीको संज्ञा दिएका छन् । उनका अनुसार अहिले गलत सूचना र भ्रमलाई निरन्तर दोहोर्‍याएर जनमानसमा सत्यजस्तै स्थापित गर्ने प्रयास भइरहेको छ ।

शुक्रबार ललितपुरको च्यासलस्थित एमाले केन्द्रीय कार्यालयमा पार्टीको आधिकारिक वेबसाइट र मोबाइल एपको नयाँ संस्करण सार्वजनिक गर्दै ओलीले समाजमा सत्यभन्दा असत्यको प्रभाव बढ्न थालेको चिन्ता व्यक्त गरे । उनले तथ्यलाई उल्ट्याएर प्रस्तुत गर्ने र त्यसैलाई सही ठान्ने वातावरण विकसित भएको बताए ।

ओलीले इतिहासको प्रसंग जोड्दै नाजी जर्मनीका प्रचारमन्त्री पल जोसेफ गोयबल्सले झूटलाई बारम्बार दोहोर्‍याएर सत्यजस्तो देखाउने रणनीति अपनाएको स्मरण गरे । अहिले भने त्योभन्दा पनि अगाडि बढेर झूटलाई व्यापक रूपमा स्थापित गर्ने अभ्यास भइरहेको भन्दै उनले त्यसलाई ‘महागोयबल्स’ शैलीको संज्ञा दिए ।

उनले समाजमा कालोलाई सेतो, सेतोलाई कालो, राम्रोलाई नराम्रो र नराम्रोलाई राम्रो भनेर व्याख्या गर्ने प्रवृत्ति बढेको उल्लेख गरे । यस्तो अवस्थाले सत्यप्रतिको विश्वास कमजोर बन्दै गएको र मानिसहरू भ्रमपूर्ण सूचनाबाट प्रभावित हुन थालेको उनको भनाइ थियो ।

अध्यक्ष ओलीले अहिलेको अवस्थाले समाज सत्य बोल्न र सत्य स्वीकार गर्नबाट टाढिँदै गएको हो कि भन्ने चिन्ता पैदा गरेको बताए । गलत सूचना र दुष्प्रचारले सामाजिक सोच र जनमत दुवैलाई प्रभावित गरिरहेको उनको तर्क थियो ।

त्यसैले सूचना प्रविधिको सकारात्मक प्रयोगमार्फत सही सूचना प्रवाह गर्नुपर्नेमा उनले जोड दिए । डिजिटल माध्यमलाई विश्वसनीय सूचना, संगठन सुदृढीकरण र जनतासँग प्रभावकारी सम्पर्क विस्तारका लागि उपयोग गर्नुपर्ने उनको भनाइ थियो ।

कार्यक्रममा एमालेको आधिकारिक वेबसाइट तथा मोबाइल एपको नयाँ संस्करण सार्वजनिक गरिएको थियो । ओलीले यसलाई पार्टीलाई अझ आधुनिक, प्रविधिमैत्री र जनतासँग प्रत्यक्ष जोड्ने महत्वपूर्ण पहलका रूपमा व्याख्या गरे ।