वैशाख २८ गतेबाट संघीय संसद् अधिवेशन सुरु हुने

काठमाडौं । राष्ट्रपति रामचन्द्र पौडेलले संघीय संसद्को दुवै सदनको अधिवेशन आह्वान गरेका छन् । राष्ट्रपतिको कार्यालयले जारी गरेको विज्ञप्तिअनुसार मन्त्रिपरिषद्को सिफारिसका आधारमा आगामी वैशाख २८ गते सोमबार दिउँसो २ः०० बजे अधिवेशन बस्ने तय गरिएको हो ।

नेपालको संविधानको धारा ९३ (१) अनुसार राष्ट्रपतिले संसद् अधिवेशन आह्वान गर्ने व्यवस्था रहेको छ । सोही संवैधानिक प्रावधानअनुसार सिंहदरबारस्थित संघीय संसद् भवनमा बैठक बस्नेछ ।

राष्ट्रपतिको कार्यालयका प्रवक्ता रितेशकुमार शाक्यले जारी गरेको सूचनामा तोकिएको मिति र समयमा प्रतिनिधिसभा तथा राष्ट्रिय सभाको बैठक सञ्चालन हुने उल्लेख गरिएको छ ।

यसअघि बसेको मन्त्रिपरिषद् बैठकले संसद् अधिवेशन बोलाउन राष्ट्रपतिसमक्ष सिफारिस गरेको थियो । सरकारले हालै विभिन्न ८ वटा अध्यादेश जारी गरेपछि ती अध्यादेशलाई संसद्मा प्रस्तुत गरी अनुमोदन गराउने उद्देश्यले अधिवेशन बोलाइएको हो ।

संसद् अधिवेशन सुरु भएसँगै ती अध्यादेशमाथि छलफल हुने, आवश्यक विधेयकहरू दर्ता गरिने तथा समसामयिक राजनीतिक विषयमा बहस हुने अपेक्षा गरिएको छ । साथै, सरकारले आगामी नीति तथा कार्यक्रम र बजेटसम्बन्धी तयारीलाई पनि अधिवेशनले गति दिने विश्वास गरिएको छ ।