सभामुखमा डीपी अर्याललाई अघि सार्ने रास्वपाको सर्वसम्मत निर्णय

काठमाडौं । राष्ट्रिय स्वतन्त्र पार्टी (रास्वपा) ले प्रतिनिधिसभाको सभामुख पदका लागि पार्टी उपसभापति डीपी अर्याललाई औपचारिक रूपमा उम्मेदवार बनाउने निर्णय गरेको छ । बिहीबार बसेको रास्वपा संसदीय दलको बैठकले अर्यालको नाम सर्वसम्मत रूपमा अनुमोदन गरेको हो ।

बैठकमा पार्टी सभापति रवि लामिछानेले सभामुख पदका लागि अर्यालको नाम प्रस्ताव गरेका थिए । सभापति लामिछानेको प्रस्तावलाई उपस्थित सांसदहरूले एकमतका साथ समर्थन गरेपछि बैठकले उक्त निर्णय पारित गरेको हो । यससँगै सभामुख चयन प्रक्रियामा रास्वपाले आफ्नो स्पष्ट दाबी प्रस्तुत गरेको छ ।

रास्वपाभित्र अर्याललाई अनुभवी, संयमित र संसदीय अभ्यासमा दक्ष नेताका रूपमा हेरिने गरिन्छ । पार्टीले संसदलाई प्रभावकारी, निष्पक्ष र जनउत्तरदायी बनाउने लक्ष्यसहित उनको उम्मेदवारी अघि सारेको नेताहरूले बताएका छन् ।