जसपा नेपालद्वारा चुनावी घोषणापत्र सार्वजनिक, संविधान पुनरावलोकन आयोग गठनको प्रस्ताव

काठमाडौं । जनता समाजवादी पार्टी (जसपा) नेपालले आगामी फागुन २१ गते हुने निर्वाचनलाई लक्षित गर्दै आफ्नो चुनावी घोषणापत्र सार्वजनिक गरेको छ । शुक्रबार काठमाडौंमा आयोजित पत्रकार सम्मेलनमार्फत पार्टीले घोषणापत्र सार्वजनिक गर्दै वर्तमान संविधानले मुलुकका समस्याको दीर्घकालीन समाधान दिन नसकेको निष्कर्ष प्रस्तुत गरेको हो ।

घोषणापत्रमा संविधानको पुनरावलोकनका लागि उच्चस्तरीय आयोग गठन आवश्यक रहेको उल्लेख गर्दै शासकीय स्वरूपमा सुधार, राष्ट्रिय पहिचानसहितको सङ्घीयता सुदृढीकरण तथा प्रादेशिक संरचनाको पुनर्संरचनामा जोड दिइएको छ । साथै न्याय प्रणालीलाई सङ्घीय ढाँचाअनुसार पुनर्गठन गर्ने, संवैधानिक निकायलाई प्रभावकारी बनाउने र जनलोकपालजस्ता नयाँ संस्थागत संयन्त्र स्थापना गर्नुपर्ने आवश्यकता औंल्याइएको छ ।

पार्टीले हालको व्यवस्था प्रशासनिक सङ्घीयतामै सीमित रहेको दाबी गर्दै विद्यमान शासकीय स्वरूप, निर्वाचन प्रणाली र न्याय प्रणालीमा परिवर्तन नगरी सङ्घीय समाजवादी व्यवस्थाको आधार निर्माण सम्भव नहुने जनाएको छ ।

शिक्षा क्षेत्रतर्फ शिशु कक्षादेखि उच्च शिक्षासम्म एकरूप, प्रविधिमैत्री, निःशुल्क, सिपमूलक तथा गुणस्तरीय सार्वजनिक शिक्षा प्रणाली विकास गर्ने लक्ष्य घोषणापत्रमा समेटिएको छ । भ्रष्टाचार नियन्त्रणका लागि शून्य सहनशीलताको नीति अपनाउने र २०४७ सालयता निर्वाचित जनप्रतिनिधि, प्रधानमन्त्री, मन्त्री तथा उच्चपदस्थ कर्मचारीको सम्पत्ति छानबिन गर्ने प्रतिबद्धता पनि पार्टीले व्यक्त गरेको छ ।

यस्तै, वैदेशिक रोजगारीमा जाने श्रमिकका लागि ‘फ्रि भिसा–फ्रि टिकट’ नीति प्रभावकारी रूपमा लागू गर्ने, वैज्ञानिक भू–उपयोग तथा भूमिसुधार नीति कार्यान्वयन गर्ने, कृषि जमिनको चक्लाबन्दी र कृषिको आधुनिकीकरणमा जोड दिने योजना पनि घोषणापत्रमा उल्लेख छ ।

पार्टीले आगामी पाँच वर्षभित्र गरिबीको रेखामुनि रहेका जनसङ्ख्यालाई १० प्रतिशतमा झार्ने लक्ष्यसमेत सार्वजनिक गरेको छ ।

(पूर्णपाठ)