प्रतिनिधिसभा निर्वाचनः उम्मेदवारविरुद्ध आज उजुरी दिन सकिने

काठमाडौं । निर्वाचन आयोगले प्रतिनिधिसभा सदस्यका लागि उम्मेदवारी दिएका उम्मेदवारको विरोधमा आज (बुधबार) उजुरी दिन सकिने जानकारी दिएको छ । निर्वाचन प्रणालीअन्तर्गत दर्ता भएका उम्मेदवारविरुद्ध उजुरी दिन सकिने व्यवस्था गरिएको हो ।

आयोगका अनुसार प्राप्त उजुरी तथा उम्मेदवारी पत्रमाथि जाँचबुझ गरी आवश्यक निर्णय माघ ८ गते साँझ ५ः०० बजेसम्म सम्पन्न गरिनेछ । सोही दिन उम्मेदवारको अन्तिम नामावली प्रकाशन गरिने आयोगले जनाएको छ ।

निर्वाचन तालिकाअनुसार माघ ९ गते बिहान १० बजेदेखि दिउँसो १ बजेसम्म उम्मेदवारले आफ्नो नाम फिर्ता लिन सक्नेछन् । त्यसै दिन दिउँसो १ः०० बजेदेखि ३ः०० बजेसम्म अन्तिम नामावली सार्वजनिक गरिनेछ भने दिउँसो ४ः०० बजेदेखि साँझ ७ः०० बजेसम्म उम्मेदवारलाई निर्वाचन चिह्न प्रदान गरिनेछ ।

निर्वाचन आयोगले प्रतिनिधिसभा सदस्य निर्वाचनतर्फको मनोनयन दर्ता कार्यक्रम मुख्य निर्वाचन अधिकृत तथा निर्वाचन अधिकृतको कार्यालयमा शान्तिपूर्ण र उत्साहजनक रूपमा सम्पन्न भएको जनाएको छ ।

आयोगका अनुसार कुल २ हजार ९२५ जनाले उम्मेदवारी दर्ता गराएका छन् । तीमध्ये ३३६ जना महिला र २ हजार ५८९ जना पुरुष उम्मेदवार रहेका छन् ।
निर्वाचन आयोगका अनुसार उम्मेदवारमध्ये ८५ जना अपाङ्गता भएका व्यक्ति र १३८ जना पिछडिएको क्षेत्रबाट रहेका छन् ।