प्रतिनिधिसभा चुनाव तयारी तीव्र बनाउन नेकपाको निर्देशन, सबै दलसँग संवाद बढाउने

काठमान्डु । आसन्न प्रतिनिधिसभा निर्वाचन नजिकिएसँगै नेपाली कम्युनिस्ट पार्टी (नेकपा) ले मुलुकभर चुनावी माहोल निर्माण गर्न व्यापक पहल अघि बढाएको छ । पार्टीले शुक्रबार अपारपार्टी निर्देश (अपानि) जारी गर्दै स्थानीयदेखि केन्द्रसम्मका सबै तहमा राजनीतिक दलहरूसँग छलफल, संवाद र सहकार्य गर्न पार्टी पंक्तिलाई निर्देशन दिएको हो ।

निर्देशनमा चुनावको समग्र वातावरण बनाउने उद्देश्यले ‘बैठक, वार्ता र छलफलमार्फत सबै दल तथा सरोकारवाला क्षेत्रमा तालमेल बढाउन’ आग्रह गरिएको छ । यससँगै सञ्चारकर्मी, बौद्धिक व्यक्ति, व्यवसायी तथा नागरिक समाजसँग समेत निर्वाचनसम्बन्धी अन्तरक्रिया सञ्चालन गर्न भनिएको छ ।

पार्टीले सरकारले गरेको जनमुखी काम र भ्रष्टाचार विरोधी पहलहरूलाई जनतामाझ प्रवर्द्धन गर्न तथा कुशासन र बेथितिका घटनाहरूको तथ्य संकलन गर्न पनि आफ्ना संरचना सक्रिय गरिने उल्लेख गरेको छ । संयोजक पुष्पकमल दाहाल ‘‘प्रचण्ड’ र सहसंयोजक माधवकुमार नेपालले हस्ताक्षर गरेको निर्देशनमा भ्रष्टाचार, अनियमितता र विकास रोकिएका उदाहरूको तथ्यगत प्रतिवेदन तयार गर्न पार्टी कार्यकर्तालाई आह्वान गरिएको छ ।

अपानिअनुसार, मतदाता शिक्षा, तालिम र गोष्ठी कार्यक्रम सञ्चालन गर्दै पार्टी तथा जनवर्गीय संगठनहरूलाई निर्वाचन केन्द्रीत गतिविधि सञ्चालन गर्न निर्देशन छ। साथै, ‘‘तारा’ चुनाव चिह्नलाई विभिन्न माध्यममार्फत आम जनतामा पहुँच पुग्नेगरी प्रचार गर्न बताइएको छ ।

पार्टीले शान्तिपूर्ण, स्वतन्त्र र भयरहित वातावरणमा निर्धारित मितिमै निर्वाचन सम्पन्न हुनुपर्नेमा जोड दिँदै वर्तमान राजनीतिक सङ्कट समाधानका लागि निर्वाचन अपरिहार्य रहेको धारणा जनाएको छ ।

अपानिमा भनिएको छ, “यतिवेलाको राष्ट्रिय संकटबाट देशलाई निकास दिन, संघीय लोकतान्त्रिक गणतन्त्रलगायत जनक्रान्तिका उपलब्धिहरूको रक्षा गर्न र संविधानलाई पूर्णरूपमा कार्यान्वयनमा ल्याउन, संविधान संशोधनका माध्यमबाट जेन–जी पुस्ताको भावनासहित जनताका अग्रगामी एजेण्डा सम्बोधन गर्न र सामाजिक न्याय, सुशासन, समृद्धि र समाजवादका आधार निर्माण गर्न पनि निर्वाचन अपरिहार्य छ ।”