मालिका पूर्णिमा पर्वमा मुसिकोटमा सार्वजनिक बिदा घोषणा

गुल्मी । बैकुण्ठ चतुर्दशी अर्थात् मालिका पूर्णिमा पर्वको अवसरमा गुल्मीको मुसिकोट नगरपालिकाले आज सार्वजनिक बिदा दिएको छ । धार्मिक तथा सांस्कृतिक महत्व बोकेको यस पर्वमा स्थानीयस्तरमा बिशेष कार्यक्रम आयोजना हुने भएकाले बिदा घोषणा गरिएको नगरपालिकाले जनाएको छ ।

नगरपालिकाका निमित्त प्रमुख प्रशासकीय अधिकृत प्रकाश घिमिरेका अनुसार आज नगर क्षेत्रअन्तर्गतका सबै वडा कार्यालय, विद्यालय, स्वास्थ्य संस्था र अन्य सार्वजनिक निकायहरू बन्द रहनेछन् ।

सदीयौंदेखि कुर्घामा लाग्दै आएको मालिका मेला
मुसिकोट–५ कुर्घास्थित मालिका देवी मन्दिर परिसरमा हरेक वर्ष जस्तै यस वर्ष पनि परम्परागत रूपमा मेला लाग्दैछ । यहाँ “मालिका देवीको दर्शन गरी चिच्याएर वर माग्ने” प्रथा सदियौँदेखि चल्दै आएको छ ।

यस धार्मिक पर्वमा गुल्मी मात्र नभई बाग्लुङ, अर्घाखाँची लगायतका छिमेकी जिल्लाबाट समेत भक्तजनहरूको ठूलो भीड लाग्ने गर्छ । बिहानैदेखि तीर्थालुहरू देवीको दर्शन र पूजाअर्चनका लागि कुर्घा पुगिरहेका छन् ।

जागराम र दीपदानको परम्परा
मालिका पूर्णिमा पर्वमा भक्तजनहरूले व्रत बस्ने, वली चढाउने, दीपदान गर्ने र देवीको आराधना गर्ने चलन रहिआएको छ । स्थानीय परम्पराअनुसार आज रातभर जागराम बसेर भोलि बिहान उज्यालो हुनुअघि पूजा गर्ने प्रचलन रहेको छ ।

मालिका पूर्णिमा गुल्मी जिल्लाका महत्वपूर्ण धार्मिक पर्वमध्ये एक हो, जसले स्थानीय समुदायबीच आस्था, एकता र सांस्कृतिक पहिचानलाई मजबुत बनाउने विश्वास गरिन्छ ।