नेपाली फुटबल टोलीको नयाँ मुख्य प्रशिक्षक बने खड्का

काठमाडौं । नेपाली राष्ट्रिय पुरुष फुटबल टोलीले नयाँ मुख्य प्रशिक्षक पाएको छ । अखिल नेपाल फुटबल संघ (एन्फा) ले हरि खड्कालाई राष्ट्रिय टोलीको मुख्य प्रशिक्षकको जिम्मेवारी दिएको हो ।

एन्फाले शुक्रबार सामाजिक सञ्जालमार्फत जानकारी दिँदै खड्कालाई आगामी एफसी एसियन कप २०२७ क्वालिफायरका लागि मुख्य प्रशिक्षक नियुक्त गरिएको जनाएको छ । एन्फाको कार्यकारिणी समितिको निर्णयअनुसार खड्काले तुरुन्तै टोलीको जिम्मेवारी सम्हाल्नेछन् ।

यसअघि गत फागुनमा नियुक्त भएका अष्ट्रेलियन प्रशिक्षक म्याट रोसले एक वर्ष पूरा नहुँदै बिहीबार राजीनामा दिएका थिए । रोसको राजीनामापछि एन्फाले तत्काल नयाँ प्रशिक्षक खोजी प्रक्रिया सुरु गरेको थियो । अनुभव, उपलब्धता र राष्ट्रिय स्तरमा गरेको योगदानका आधारमा हरि खड्का अन्ततः रोजिएका हुन् ।

पूर्व राष्ट्रिय खेलाडी रहेका हरि खड्का लामो समयदेखि नेपाली फुटबलमा सक्रिय छन् । उनले क्लब फुटबलमा प्रशिक्षकको रूपमा सफलता हासिल गरिसकेका छन् । खड्काले राष्ट्रिय टोलीका लागि खेल्दै गर्दा स्ट्राइकरको भूमिकामा उत्कृष्ट प्रदर्शन गरेका थिए । पछिल्ला वर्षहरूमा उनी युवा र महिला फुटबल विकासमा पनि संलग्न रहँदै आएका थिए ।