चक्रवात ‘मोन्था’को प्रभाव बिहीबारदेखि नेपालमा, तीन दिनसम्म मौसम प्रभावित हुने

काठमाडौं । बंगालको खाडीमा विकसित भएको चक्रवात ‘मोन्था’को प्रभाव नेपालमा आगामी बिहीबार दिउँसोदेखि देखिने जल तथा मौसम विज्ञान विभागले जनाएको छ । विभागले आज (मंगलबार) सार्वजनिक गरेको विशेष बुलेटिनमा चक्रवातको प्रभाव तीन दिनसम्म रहने उल्लेख गरिएको छ ।

विभागका अनुसार चक्रवात मोन्था अहिले भारतको आन्ध्र प्रदेशतर्फ अगाडि बढिरहेको छ । आज राति उक्त क्षेत्र प्रवेश गरेपछि क्रमशः कमजोर हुँदै यो प्रणाली उत्तर–उत्तर पश्चिमतर्फ सर्दै न्यूनचापीय क्षेत्रको रूपमा नेपाल नजिकिने अनुमान गरिएको छ । चक्रवात कमजोर भए पनि यसको प्रभावले नेपालको बागमती, मधेश र कोशी प्रदेशको मौसमलाई विशेष रूपमा प्रभावित गर्ने देखिएको छ ।

मधेश र कोशीमा भारी वर्षाको सम्भावना
विभागका अनुसार मधेश र कोशी प्रदेशका धेरै स्थानहरूमा मध्यम वर्षा तथा केही स्थानहरूमा भारी वर्षा हुने सम्भावना छ । बागमती प्रदेशका केही स्थानमा पनि मध्यम वर्षा हुने पूर्वानुमान गरिएको छ । त्यस्तै, गण्डकी र लुम्बिनी प्रदेशका पूर्वी भूभागमा हल्का वर्षा हुन सक्ने देखिएको छ ।

हिमाली भूभागमा हिमपात
कोशी र बागमती प्रदेशका उच्च पहाडी तथा हिमाली क्षेत्रमा मध्यमदेखि भारी हिमपात हुन सक्ने सम्भावना छ । गण्डकी प्रदेशका हिमाली भूभागमा पनि मध्यम स्तरको हिमपात हुन सक्ने उल्लेख गरिएको छ ।

बाढी र पहिरोको जोखिम
विभागले चेतावनी दिँदै भनेको छ कि चक्रवातको प्रभावले देशका विभिन्न नदीहरूमा बहाव उल्लेख्य रूपमा बढ्ने सम्भावना छ । विशेषगरी बागमती, कोशी, कमला र कन्काई नदी तथा तिनका सहायक नदीहरूमा सतर्कता तहसम्म पानीको बहाव पुग्न सक्ने अनुमान गरिएको छ ।

त्यस्तै, बागमती प्रदेशका काठमाडौं उपत्यका, सिन्धुपाल्चोक, काभ्रे, दोलखा, मकवानपुर, सिन्धुली, चितवन, मधेश प्रदेशका बारा, पर्सा, रौतहट, सर्लाही, महोत्तरी, धनुषा, सप्तरी, र कोशी प्रदेशका झापा, मोरङ, सुनसरी, इलाम, भोजपुर, धनकुटा, तेह्रथुम, ताप्लेजुङ र संखुवासभा जिल्लामा बहने साना नदी–नालामा आकस्मिक बाढीको जोखिम उच्च रहेको विभागले जनाएको छ ।

जनसाधारणलाई सतर्क रहन आग्रह
विभागले सम्भावित वर्षा र हिमपातका कारण बाढी, पहिरो, सडक तथा हवाई यातायात अवरोध, कृषि र पर्यटन क्षेत्रमा असर पर्न सक्ने चेतावनी दिएको छ । साथै, विभागले आफ्नो वेबसाइट, सामाजिक सञ्जाल र टोल–फ्री नम्बर ११५५५० मार्फत अद्यावधिक सूचना लिएर आवश्यक सतर्कता अपनाउन सबैलाई आग्रह गरेको छ ।

विभागले मोन्था चक्रवातको गतिशीलता र यसको प्रभावबारे नियमित अनुगमन भइरहेको बताउँदै, जनसुरक्षाका उपाय अपनाउन सम्बन्धित निकाय र नागरिकलाई तयार रहन अनुरोध गरेको छ ।