बीपी राजमार्गमा रातिको सवारी रोक, प्रशासनले जारी गर्‍यो चेतावनी

काभ्रेपलाञ्चोक । निरन्तर वर्षाका कारण बाढी र पहिरोको जोखिम बढेपछि बीपी राजमार्गमा रातिको समयमा सवारीसाधन सञ्चालनमा रोक लगाइएको छ ।

काभ्रेपलाञ्चोक र सिन्धुली दुवै जिल्लाका प्रशासन कार्यालयहरूले बिहीबार छुट्टाछुट्टै सूचना जारी गर्दै रातिको समयमा राजमार्ग बन्द रहने जानकारी दिएका हुन् ।

काभ्रे प्रशासनका अनुसार बिहीबार साँझ ५ बजेदेखि शुक्रबार बिहान ६ बजेसम्म काभ्रेभञ्ज्याङदेखि सिन्धुली खण्डसम्म सवारी सञ्चालन निषेध गरिएको हो ।

प्रशासनले रोशी खोला र स्थानीय खहरे खोलाहरूमा पानीको बहाव बढेको उल्लेख गर्दै अन्य समयमा पनि बाढी आएमा प्रहरी वा ट्राफिक प्रहरीले सवारी रोक्न सक्ने जनाएको छ ।

सिन्धुली प्रशासनले पनि १३ र १४ कात्तिकमा साँझ ५ बजेदेखि बिहान ६ बजेसम्म खुर्कोट बजारदेखि काठमाडौंतर्फ सवारी आवागमन रोक्ने निर्णय गरेको छ ।

दिउँसो भारी वर्षा भएमा पनि सुरक्षाकर्मीले जोखिमका आधारमा सवारी सञ्चालन रोक्न सक्ने व्यवस्था गरिएको प्रशासनको विज्ञप्तिमा उल्लेख छ ।

वर्षाको कारण राजमार्गका विभिन्न भागमा बाढीको जोखिम देखिएकाले यात्रु र चालकहरूलाई सतर्क रहन प्रशासनले आग्रह गरेको छ ।