कांग्रेस केन्द्रीय कार्यसमिति बैठक आज दिउँसो बस्दै

काठमाडौं । नेपाली कांग्रेसको केन्द्रीय कार्यसमिति बैठक आज बस्दै छ । बैठक दिउँसो १ बजे पार्टी केन्द्रीय कार्यालय, बीपी स्मृति भवन, ललितपुरमा बस्न लागेको हो ।

गत असोज २८ गतेदेखि सुरु भएको बैठकमा भदौ २३ र २४ गतेका जेनजी आन्दोलन, अन्तरिम सरकार गठन, प्रतिनिधिसभा विघटनपछि उत्पन्न राजनीतिक परिस्थिति र त्यसमा कांग्रेसको भूमिकाबारे केन्द्रित छलफल हुँदै आएको छ ।

आजको बैठकमा पार्टीको आसन्न १५औँ महाधिवेशनबारे विस्तृत छलफल हुने जनाइएको छ । सभापति शेरबहादुर देउवा नेतृत्वको वर्तमान कार्यसमितिको कार्यकाल मङ्सिरभित्र सकिँदैछ । यस सन्दर्भमा पार्टीको नियमित महाधिवेशन गर्ने वा नगर्ने भन्ने विषयमा लगातार चर्चा हुँदै आएको छ ।

यदि नियमित महाधिवेशन समयमै हुन नसके विशेष महाधिवेशन गर्नुपर्ने मागसहित केही नेताहरूले महाधिवेशन प्रतिनिधिको हस्ताक्षर अभियान समेत सञ्चालन गरेका थिए । उक्त अभियानमा करिब ५४ प्रतिशत प्रतिनिधिले विशेष महाधिवेशनको पक्षमा हस्ताक्षर गरेको जनाइएको छ ।

यसअघि असोज २८ गते सुरु भएको बैठकमा पार्टी सभापति देउवाले स्वास्थ्य अवस्थाका कारण उपसभापति पूर्णबहादुर खड्कालाई कार्यवाहक सभापतिको जिम्मेवारी दिएका थिए । त्यसयता खड्काको सभापतित्वमा बैठकहरू सञ्चालन हुँदै आएका छन् ।

तिहार र छठ पर्वका कारण स्थगित भएको बैठक कात्तिक १ गते अन्तिम पटक बसेको थियो । सो बैठकले पूर्वकेन्द्रीय सदस्य ऋषिकेश गौतमको निधनप्रति शोक प्रस्ताव पारित गरी अर्को बैठक आजका लागि तोकेको हो ।