बंगालको खाडीमा चक्रवात ‘मोन्था’ सक्रिय, बिहीबारदेखि नेपालमा पनि प्रभाव

काठमाडौं । बंगालको खाडीमा बनेको चक्रवात ‘मोन्था’ आज (मंगलबार) थप शक्तिशाली बन्दै गम्भीर चक्रवाती आँधीमा परिणत हुने भारतीय मौसम विभागले जनाएको छ ।

विभागका अनुसार उक्त चक्रवात आज बेलुका वा राततिर आन्ध्र प्रदेशको काकिनाडा, मछलीपट्टनम र कलिंगपट्टनमको बीचको तट क्षेत्र पार गर्ने सम्भावना छ । त्यसबेला हावाको गति प्रतिघण्टा ९० देखि १०० किलोमिटरसम्म पुग्न सक्ने अनुमान गरिएको छ ।

चक्रवातको प्रभावले आन्ध्र प्रदेश र तमिलनाडुका केही भागमा भारी वर्षा हुन सक्ने बताइएको छ । यस्तै, ओडिशा र महाराष्ट्रको विदर्भ क्षेत्रमा पनि २८ देखि ३० अक्टोबरबीच मध्यमदेखि भारी वर्षाको सम्भावना रहेको भारतीय मौसम विभागले उल्लेख गरेको छ ।

मौसमविद्हरूका अनुसार ‘मोन्था’को प्रभाव नेपालमा पनि देखिनेछ । बंगालको खाडीबाट विकसित यो प्रणाली केही दिनमै पूर्वी नेपाल प्रवेश गर्नेछ र बिहीबारदेखि कोशी प्रदेश, मधेश हुँदै मध्य नेपालसम्म प्रभाव पर्ने पूर्वानुमान गरिएको छ ।