खिजीदेम्बा खुल्ला फुटबल कप–२०८२ कात्तिक १८ देखि

खिजीफलाटे (ओखलढुंगा) । पवित्र युवा क्लबको आयोजनामा खिजीदेम्बा खुल्ला फुटबल कप–२०८२ दोस्रो संस्करण आगामी कात्तिक १८ गतेदेखि खिजीदेम्बा–३ स्थित खिजीचण्डेश्वरी खेलमैदानमा सुरु हुने भएको छ । प्रतियोगिता कात्तिक २५ गतेसम्म सञ्चालन हुनेछ ।

आयोजक क्लबका अन्जन सुनुवारका अनुसार प्रतियोगिताका लागि टिम दर्ता कात्तिक १७ गते बिहान १० बजेभित्र गर्नुपर्नेछ । टाइसिट प्रकाशन सोही दिन अपरान्ह २ः०० बजे गरिनेछ ।

प्रतियोगिता खिजीदेम्बा गाउँपालिकाको मुख्य प्रायोजन र वडा नं. ३ कार्यालयको सह–प्रायोजनमा सञ्चालन हुँदैछ ।

पुरुषतर्फको विजेता टोलीले १ लाख ५० हजार रुपैयाँसहित शिल्ड, मेडल र प्रमाण–पत्र प्राप्त गर्नेछ भने उपविजेताले १ लाख रुपैयाँ, शिल्ड, मेडल र प्रमाण–पत्र पाउनेछ । सेमिफाइनलमा पुग्ने टोलीहरूलाई ४० हजार रुपैयाँका दरले नगद प्रदान गरिनेछ ।

टिम दर्ता शुल्क ५ हजार रुपैयाँ र कार्ड धरौटी ३ हजार रुपैयाँ तोकिएको छ । खेल ९–ए साइडमा लिग–कम–नकआउट प्रणालीमा खेलाइनेछ । प्रत्येक टोलीमा वैकल्पिक खेलाडीसहित १३ जना खेलाडी, कोच र म्यानेजर मिलाएर १५ जना सदस्य राख्नुपर्नेछ । खेलको अन्तिम निर्णय रेफ्री तथा निर्णायक मण्डलको हुनेछ ।

त्यस्तै महिलातर्फ वडास्तरीय खुला प्रतियोगिता पनि आयोजना हुने भएको छ । महिलातर्फको खेल कात्तिक २५ र २५ गते सञ्चालन हुनेछ । महिला टोलीमा अन्य वडाका तीन खेलाडीसम्म समावेश गर्न सकिने व्यवस्था गरिएको छ ।

महिला विजेता टोलीले ५० हजार रुपैयाँ, शिल्ड, मेडल र प्रमाण–पत्र पाउनेछ भने उपविजेताले ३० हजार रुपैयाँ, शिल्ड, मेडल र प्रमाण–पत्र प्राप्त गर्नेछ । सेमिफाइनलिस्ट टोलीहरूलाई १५ हजार रुपैयाँ दिइनेछ ।

महिलातर्फ टीम दर्ता शुल्क १ हजार रुपैयाँ र कार्ड धरौटी १५ सय रुपैयाँ निर्धारण गरिएको सुनुवारले जानकारी दिए ।

महिला र पुरुष दुबै समूहमा उत्कृष्ट खेलाडी, गोलरक्षक र सर्वाधिक गोलकर्ता एक/एक जना खेलाडीलाई ट्रफी, मेडल र प्रमाण–पत्र प्रदान गरिनेछ ।