डाइभर्सन निर्माणपछि बीपी राजमार्ग आंशिक रूपमा सञ्चालन

काठमाडौं । चौकीडाँडा–बर्खेखोला–नेपालथोक खण्डमा करिब चार किलोमिटर डाइभर्सन निर्माण भएपछि बीपी राजमार्ग एकतर्फी सञ्चालनमा आएको छ । ट्रयाक खुलेसँगै फसेका साना र ठूला सबै सवारीसाधन आवतजावत गर्न थालेको सडक डिभिजन कार्यालयले जनाएको छ ।

कार्यालयकी सूचना अधिकारी बिन्दु अधिकारीका अनुसार हिजो रातिदेखि निरन्तर भइरहेको कामपछि ट्रयाक प्रयोगयोग्य बनेको हो । “सिन्धुलीतर्फबाट भने पूर्णरूपमा नआए पनि महाभारत गाउँपालिका र मंगलटार क्षेत्रका बस्तीहरूबाट आएका सबैखाले गाडी पास भइसकेका छन्,” उनले बताइन् ।

यद्यपि ट्रयाक अझै सम्याउन बाँकी रहेको उनले स्पष्ट पारिन् । उनका अनुसार आज रातभर ग्रेडर र रोलरमार्फत लेभल मिलाउने र माटो बलियो बनाउने काम गरिँदैछ । “लेभल नमिलेका कारण जुनसुकै गाडी फस्न सक्छ । आज रातिदेखि माटो च्याप्ने काम सकिएपछि भोलिदेखि निर्बाध सञ्चालन हुन्छ,” अधिकारीले भनिन् ।

गत वर्ष यस्तै क्षतिले उक्त क्षेत्रमा आठ किलोमिटर सडक अवरुद्ध हुँदा यातायात सञ्चालनका लागि १५ दिन लागेको थियो । त्यतिबेला २२ किलोमिटर सडकमध्ये धुलिखेल–सिन्धुली–बर्दिबास खण्डका तीन भाग सञ्चालनमा आएका थिए । यसपालि क्षति पुगेको नेपालथोक–धुलिखेल करिब चार किलोमिटर खण्ड पनि पुनः सञ्चालनमा आइसकेकाले अहिले अवरोध नरहेको उनले जनाइन् ।

यसअघि भौतिक पूर्वाधार तथा यातायातमन्त्री कुलमान घिसिङले स्थल निरीक्षण गर्दै द्रुत गतिमा काम सम्पन्न गर्न निर्देश दिएका थिए । उक्त निर्देशनपछि बिहीबार रातिसम्म पनि निर्माण कार्य जारी रहेको थियो ।

गत वर्ष असोजमा आएको बाढीले नेपालथोकदेखि चौकीडाँडासम्मको २२ किलोमिटर सडकखण्डमध्ये आधाभन्दा बढी भाग रोशीखोलाले बगाएको थियो । प्रभावित क्षेत्रमा पुनर्निर्माणका लागि तीन छुट्टाछुट्टै खण्डमा विभाजन गर्दै ठेक्का सम्झौता भइसकेको सडक डिभिजन कार्यालयले जानकारी दिएको छ ।