प्रदर्शनपछि भाटभटेनीका १२ स्टोर अझै बन्द, कर्मचारीको जागिर सुरक्षित

काठमाडौं । भदौ २४ गतेको प्रदर्शनमा तोडफोड, चोरी–डकैती र आगजनीको मारमा परेका भाटभटेनी सुपरस्टोरका १२ वटा शाखा अझै सञ्चालनमा आउन सकेका छैनन् । तर, यति ठूलो क्षति भए पनि कुनै पनि कर्मचारीले जागिर तथा सेवा–सुविधा गुमाउन नपर्ने भाटभटेनी सुपरस्टोरले स्पष्ट पारेको छ ।

हाल भाटभटेनीमा १० हजारभन्दा बढी कर्मचारी कार्यरत छन् । प्रदर्शनका क्रममा केन्द्रीय कार्यालयसहित २८ मध्ये १२ वटा स्टोरमा आगजनी गरी पूर्ण क्षति पुर्याइएको थियो । त्यस्तै, ९ वटा शाखामा तोडफोड र चोरी–डकैती भए पनि ७ वटामा कुनै क्षति पुगेको थिएन ।

अहिलेसम्म भाटभटेनीले १६ वटा शाखा पुनः सञ्चालनमा ल्याइसकेको छ भने बाँकी १२ वटा अस्थायी रूपमा बन्द छन् । बन्द रहेका शाखाका कर्मचारीलाई अन्य सञ्चालनमा रहेका सुपरस्टोरमा काममा खटाइएको प्रमुख सञ्चालन अधिकृत पानु पौडेलले जानकारी दिए ।

कम्पनीका अनुसार भाटभटेनी सुपरस्टोरले वार्षिक झण्डै ३७ अर्ब रुपैयाँ बराबरको व्यापार गर्दै आएको छ ।