सिंहदरबार परिसरका जलेका सवारीसाधन हटाउन मन्त्री घिसिङको निर्देशन

काठमाडौं । ऊर्जा, जलस्रोत तथा सिँचाइ, भौतिक योजना तथा यातायात र सहरी विकासमन्त्री कुलमान घिसिङले जेनजी आन्दोलनका क्रममा सिंहदरबार परिसरमा जलेका सवारीसाधन तत्काल हटाएर व्यवस्थापन गर्न निर्देशन दिएका छन् ।

मन्त्री घिसिङको सचिवालयका अनुसार जलेका सवारीसाधनले सिंहदरबारको स्वरूप कुरुप देखिएकाले ती सवारीसाधनलाई अन्यत्र सारेर व्यवस्थापन गर्न आजै निर्देशन दिइएको हो ।

“कार्यालयलाई थोत्रो देखाएर राख्नुभएन। भित्री भागमा काम भइरहला तर बाहिरी भागलाई कुरुप हुन दिनुभएन । क्षति पुगेका सवारीसाधन छरपस्ट देखिएका छन्, अब सकारात्मक सन्देश दिन तत्काल हटाएर व्यवस्थापन गरौँ,” मन्त्री घिसिङले भनेका छन् ।

उनले आगलागीबाट आंशिक क्षति भएका भवनका बाहिरी भागमा रङरोगन गर्ने, मन्त्रालय तथा कार्यालय परिसरमा जलेका सवारीसाधन तुरुन्त हटाउने र क्षतिको मूल्याङ्कन छिट्टै गर्ने कार्यमा जुट्न सम्बन्धित निकायलाई निर्देशन दिएका छन् ।

साथै, ‘हाम्रा संरचना हामी आफैँ बनाऔँ’ अभियानमार्फत स्वदेश तथा विदेशमा रहेका नेपालीको सहयोग संकलन गरी पुनर्निर्माण सुरु गरिने उनले स्पष्ट पारे ।

यसैबीच, सहरी विकास मन्त्रालयले मातहतका संरचनामा पुगेको क्षति यकिन गर्न कार्यदल गठन गरी काम सुरु गरिसकेको जनाएको छ ।