प्रतिनिधिसभा विघटन, फागुन २१ मा निर्वाचन घोषणा

काठमाडौं । राष्ट्रपति रामचन्द्र पौडेलले प्रधानमन्त्री सुशीला कार्कीको सिफारिसमा प्रतिनिधिसभा विघटन गरेका छन् । शुक्रबार राति प्रधानमन्त्री पदको शपथग्रहण लगत्तै कार्कीले प्रतिनिधिसभा विघटनको सिफारिस गरेकी थिइन्, जुन सिफारिस राष्ट्रपति पौडेलले तत्काल सदर गरेका हुन् ।

राष्ट्रपति कार्यालयले शुक्रबार राति एक विज्ञप्ति जारी गर्दै राति ११ः०० बजेदेखि प्रतिनिधिसभा विघटनको निर्णय लागू भएको जनाएको छ । संविधान बमोजिम अन्तरिम सरकारको नेतृत्वमा आगामी निर्वाचन सम्पन्न गराउने उद्देश्यसहित कार्कीलाई प्रधानमन्त्री नियुक्त गरिएको हो ।

आगामी फागुन २१ गते नयाँ निर्वाचन
प्रतिनिधिसभा विघटनसँगै राष्ट्रपति पौडेलले आगामी फागुन २१ गते नयाँ प्रतिनिधिसभा निर्वाचनको मिति तोक्ने घोषणा समेत गरेका छन् । यो घोषणा निर्वाचन आयोग र संवैधानिक प्रक्रियासँग समन्वय गरेर गरिएको जनाइएको छ ।

प्रधानमन्त्री कार्कीलाई अन्तरिम सरकार प्रमुखका रूपमा ६ महिनाभित्र निर्वाचन सम्पन्न गराउने जिम्मेवारी दिइएको छ । उनीमाथि निष्पक्ष, पारदर्शी र समावेशी निर्वाचन गराउने अपेक्षा गरिएको छ ।