देशभर १३ हजारभन्दा बढी कैदी फरार, अझै ११ हजारभन्दा बढी बेपत्ता

काठमाडौं । जेनजी आन्दोलनका क्रममा देशभरका कारागार तथा बाल सुधार गृहबाट १३ हजार ११४ कैदीबन्दी फरार भएका मध्ये १ हजार २९८ जना मात्रै नियन्त्रणमा आएका छन् ।

अनौपचारिक क्षेत्र सेवा केन्द्र (इन्सेक) ले शुक्रबार सार्वजनिक गरेको तथ्यांकअनुसार अझै ११ हजार ८६८ जना कैदीबन्दी फरार रहेका छन् । फरार हुने क्रममा ९ जनाको मृत्यु भएको छ भने २५ जना घाइते भएका छन् ।

इन्सेकका अनुसार आन्दोलन सुरु हुनु अघि जेल तथा सुधारगृहमा १६ हजार ७९७ कैदीबन्दी रहेका थिए । हालसम्म ४ हजार ८९५ मात्र कैदमा रहेको तथ्यांकले देखाएको छ ।

३५ जिल्लाका कारागार तथा बाल सुधार गृहमा यस्तो अवस्था देखिएको हो । ती जिल्लाबाट इन्सेकका प्रतिनिधिहरूले संकलन गरेको विवरणका आधारमा विस्तृत रिपोर्ट सार्वजनिक गरिएको हो ।