पूर्वप्रदेश प्रमुख अहिराजलाई थुनामा पठाउने जिल्लाको आदेश उच्च अदालतबाट सदर

काठमाडौं । मधेस प्रदेशका पूर्वप्रदेश प्रमुख राजेझ झा (राजेश अहिराज) लाई थुनामा पठाउने जिल्ला अदालतको आदेश उच्च अदालत पाटनले सदर गरेको छ ।

मुख्य न्यायाधीश लालबहादुर कुँवर र न्यायाधीश खडानन्द तिवारीको संयुक्त इजलासले जिल्ला अदालतको आदेश यथावत् राख्दै अहिराजको पुर्पक्ष थुनाको फैसला कायम गरेको हो ।

०८१ जेठ ४ गते काठमाडौंस्थित डेरामा एक महिलामाथि बलात्कार गरेको आरोपमा उनीविरुद्ध उजुरी परेको थियो । सोही उजुरीका आधारमा प्रहरी अनुसन्धानपश्चात् सरकारी वकिलको कार्यालय काठमाडौंले जिल्ला अदालतमा मुद्दा दायर गरेको हो ।

गत साउन ४ गते पक्राउ परेका अहिराजलाई साउन १४ गते न्यायाधीश पिताम्बर शर्माको इजलासले थुनामा पठाउने आदेश दिएको थियो । त्यसविरुद्ध उनी उच्च अदालत पुगेका थिए ।

तर, उच्च अदालतले जिल्ला अदालतको निर्णय सदर गरेसँगै अहिराज डिल्लीबजार कारागारमै रहने भएका छन् ।