१८ देखि ३५ वर्षसम्मलाई ‘युवा’ मान्ने नीति स्वीकृत

काठमाडौं । सरकारले युवाको उमेर अब १८ देखि ३५ वर्षसम्म कायम गर्ने निर्णय गरेको छ । हालै मन्त्रिपरिषद् बैठकले ‘राष्ट्रिय युवा नीति–२०८२’ स्वीकृत गरेसँगै यो व्यवस्था लागू भएको हो ।

राष्ट्रिय युवा परिषद्का कार्यकारी उपाध्यक्ष सुरेन्द्र बस्नेतका अनुसार यसअघि ‘राष्ट्रिय युवा नीति–२०७२’ अन्तर्गत १६ देखि ४० वर्षलाई युवा मानिन्थ्यो । नयाँ नीतिमा भने नेपालकै सामाजिक–आर्थिक सन्दर्भलाई ध्यानमा राखी १८–३५ वर्षलाई मात्रै युवा परिभाषित गरिएको छ ।

२०७८ सालको जनगणना अनुसार १६–४० वर्ष उमेर समूहको जनसंख्या ४२.५६ प्रतिशत थियो । बस्नेतले नयाँ नीतिअनुसार १८–३५ वर्षको जनसंख्या पुनः गणना गर्न आग्रह गरिएको जानकारी दिए ।

बालबालिकासम्बन्धी ऐनले १८ वर्षमुनिलाई बालबालक मानेको छ । त्यसैले १८ वर्षपछि मात्रै युवा सुरुआत हुने तर्क गरिएको हो ।
यद्यपि ‘राष्ट्रिय युवा परिषद् ऐन–२०७२’ मा अझै पनि १६–४० वर्षलाई युवा भनिएको छ । बस्नेतले नयाँ नीति कार्यान्वयनका लागि ऐन संशोधन आवश्यक रहेको बताए ।

संयुक्त राष्ट्रसंघले १५–२४ वर्षलाई युवा परिभाषित गरेको छ भने भारतमा पनि यही मान्यता छ । तर नेपालले आफ्नै आवश्यकता र परिस्थिति अनुसार उमेर सीमा पुनः परिभाषित गरेको हो ।

युवा नीति हरेक पाँच वर्षमा संशोधन गर्नुपर्ने व्यवस्था भए पनि यो पटक १० वर्षपछि मात्र नयाँ नीति ल्याइएको हो ।