देशभर मनसुन सक्रिय, केही स्थानमा भारी वर्षाको सम्भावना

काठमाडौं । हाल मनसुनको न्यून चापीय रेखा सामान्यतया यसको औसत अवस्थाको उत्तरतर्फ सरेको छ र देशको तराई क्षेत्रमा अवस्थित छ । यद्यपि देशभर मनसुनको प्रभाव कायम रहे पनि जलवाष्पयुक्त हावाको आपूर्ति केही कमजोर भएको मौसम पूर्वानुमान महाशाखाले जनाएको छ ।

महाशाखाका अनुसार आज कोशी र लुम्बिनी प्रदेशका साथै देशका पहाडी क्षेत्रहरूमा सामान्य बदली रहनेछ भने बाँकी भू–भागमा आंशिक बदली रहने अनुमान गरिएको छ । कोशी र लुम्बिनी प्रदेशका पहाडी र तराई भू–भागका केही स्थानमा, साथै अन्य प्रदेशका पहाडी तथा तराई क्षेत्रका थोरै स्थानहरूमा मध्यम खालको वर्षा हुने सम्भावना छ ।

त्यस्तै, कोशी, बागमती र गण्डकी प्रदेशका पहाडी क्षेत्रका एक–दुई स्थानमा भारी वर्षा हुन सक्ने पूर्वानुमान गरिएको छ ।

आज रातिको मौसमबारे पनि महाशाखाले जानकारी दिँदै देशभर सामान्यतया बदली रहने जनाएको छ । मधेस, कोशी र लुम्बिनी प्रदेशका पहाडी तथा तराई भागका केही स्थानहरूमा र अन्य प्रदेशका केही थोरै स्थानहरूमा पनि मध्यम वर्षा हुन सक्ने देखिएको छ । विशेषगरी कोशी प्रदेशको पहाडी भू–भागमा भारी वर्षाको जोखिम यथावत् रहेको महाशाखाले चेतावनीस्वरूप उल्लेख गरेको छ ।