देशभर ७८ प्रतिशतभन्दा बढी क्षेत्रफलमा धान रोपाइँ

काठमाडौं । चालु वर्षको साउन दोस्रो सातासम्म देशभर ७८.८४ प्रतिशत खेतमा धान रोपाइँ सम्पन्न भएको छ । कृषि तथा पशुपन्छी विकास मन्त्रालयका अनुसार यो तथ्यांक आइतबारसम्मको हो ।

प्रदेशगत विवरणअनुसार सबैभन्दा बढी रोपाइँ सुदूरपश्चिम प्रदेशमा भएको छ, जहाँ ९८.९४ प्रतिशत क्षेत्रफलमा रोपाइँ सकिएको छ । त्यसपछि लुम्बिनीमा ९२.०४ प्रतिशत, कर्णालीमा ९१.३८ प्रतिशत र बागमतीमा ८७.१९ प्रतिशत खेतमा रोपाइँ सम्पन्न भएको मन्त्रालयले जनाएको छ ।

कोशी प्रदेशमा ८०.३९ प्रतिशत र मधेश प्रदेशमा ५१.८२ प्रतिशत क्षेत्रफलमा मात्र रोपाइँ भएको छ भने गण्डकी प्रदेशमा भने यो दर अत्यन्तै कम (८.५३) प्रतिशत मात्रै रहेको छ ।

गत वर्षको यही समयमा (साउन १३ गतेसम्म) देशभर ९२.६ प्रतिशत रोपाइँ सम्पन्न भइसकेको थियो । यसपालि मधेश प्रदेशसहित केही क्षेत्रमा पर्याप्त वर्षा नहुनु र जलस्रोतको अभाव प्रमुख कारण बनेको मन्त्रालयको भनाइ छ ।