खिजीदेम्बा–५ मा सामाजिक सुरक्षा भत्ता नविकरण सुरु

ओखलढुंगा (खिजीफलाटे) । खिजीदेम्बा गाउँपालिका–५, ओखलढुंगाले आर्थिक वर्ष २०८२/८३ का लागि सामाजिक सुरक्षा भत्ता नविकरण प्रक्रिया सुरु गरेको छ । नेपाल सरकारले प्रदान गर्ने सामाजिक सुरक्षा भत्ताका लागि लाभग्राहीहरूको विवरण अद्यावधिक गर्न वडा कार्यालयले आज (साउन ११) बाट औपचारिक रूपमा नविकरण प्रक्रिया अघि बढाएको हो ।

यस कार्यको सुरुवात जनज्योति आधारभूत विद्यालय, निभारेबाट गरिएको छ । त्यहाँ केन्द्र निर्धारण गरी सो क्षेत्रका लाभग्राहीहरूको विवरण संकलन सुरु गरिएको वडा कार्यालयले जनाएको छ ।

यसअघि सार्वजनिक गरिएको सूचनाअनुसार, लाभग्राहीहरूले तोकिएको मिति र स्थानमा आवश्यक कागजातसहित उपस्थित भई साउन ११ गतेदेखि भदौ १० गतेभित्र नविकरण गर्नुपर्नेछ । नविकरणका लागि नागरिकताको प्रतिलिपि, राष्ट्रिय परिचयपत्र वा सोको आवेदन फाराम, बालपोषण, अपाङ्गता वा एकल महिला भत्ताका हकमा सम्बन्धित प्रमाणपत्रहरू अनिवार्य हुने वडाले स्पष्ट पारेको छ ।

वडाले समयमै नविकरण नगरिएमा कुनै पनि प्रकारको जिम्मेवारी नलिने स्पष्ट गर्दै लाभग्राहीहरूलाई तोकिएको समयमा उपस्थित हुन अनुरोध गरेको छ ।

वडाले तोकेको तालिकाअनुसार:

*  साउन ११ गते जनज्योति आधारभूत विद्यालय, निभारे

*  साउन १२ गते थामथोले आधारभूत विद्यालय, चुप्लुभञ्ज्याङ

*  साउन १३ गतेदेखि भदौ १० गतेसम्म वडा कार्यालयको भवन ।

सूचनामा भनिएको छ, “समयमै नविकरण नगरेमा वडाले कुनै जिम्मेवारी वहन गर्ने छैन ।”

नविकरणका लागि आवश्यक कागजातहरू:
— नागरिकताको प्रमाणपत्रको प्रतिलिपि

— राष्ट्रिय परिचयपत्र वा सोको आवेदन रुजु फारामको प्रतिलिपि

— बालपोषण भत्ताका लागि बच्चाको जन्मदर्ता र बुबाआमाको नागरिकताको प्रतिलिपि

— अपाङ्गता भत्ताका लागि अपाङ्गताको परिचयपत्रको प्रतिलिपि

— एकल महिला भत्ताका लागि श्रीमानको मृत्यु दर्ता र अविवाहित सिफारिसको प्रतिलिपि

वडाले लाभग्राहीहरूलाई तोकिएको मिति र स्थानमा आवश्यक कागजातसहित उपस्थित भई नविकरण प्रक्रिया पूरा गर्न आग्रह गरेको छ ।