साइबेरियाको जङ्गलमा दुर्घटनाग्रस्त विमान फेला, सबै सवारको ज्यान गएको आशंका

काठमाडौं । सुदूरपूर्वी रुसको साइबेरिया क्षेत्रबाट बिहीबार बेपत्ता भएको एउटा यात्रुबाहक विमान दुर्घटनाग्रस्त अवस्थामा फेला परेको छ ।

रुसी निर्माण कम्पनी एन्टोनोभको एन–२४ मोडेलको उक्त विमान अमूर क्षेत्रको ब्लागोभेस्चेन्स्क शहरबाट टिन्ड्रा गन्तव्यतर्फ जाँदै थियो । उडान भरिएको केहीबेरमै सम्पर्कविहीन भएको विमानको भग्नावशेष टिन्ड्राबाट झण्डै १५ किलोमिटर टाढा घना जङ्गलमा भेटिएको हो ।

विमानमा ४३ जना यात्रु र ६ जना चालक दलसहित ४९ जना सवार थिए ।

खोज र उद्धारका लागि परिचालित हेलिकोप्टरबाट खिचिएको तस्बिरमा विमान पूर्ण रूपमा क्षतविक्षत अवस्थामा देखिएको छ । प्रारम्भिक अनुमानअनुसार सबै सवारको ज्यान गएको हुनसक्ने आशंका गरिएको छ, यद्यपि आधिकारिक पुष्टि आउन बाँकी छ ।

उक्त एन–२४ मोडेलको विमान सन् १९७६ मा निर्माण भएको थियो । विमान अङ्गरा एअरलाइन्स नामक साइबेरियामा आधारित क्षेत्रीय सेवा प्रदायक कम्पनीद्वारा सञ्चालित थियो ।

विमान दुर्घटनाको कारण हालसम्म खुलेको छैन । रुसी नागरिक उड्डयन प्राधिकरण र आपतकालीन सेवा निकायले घटनास्थलमा अनुसन्धान प्रारम्भ गरिसकेको जनाएका छन् ।

यो दुर्घटना पछिल्लो समय साइबेरिया क्षेत्रमा भएका उड्डयन दुर्घटनाहरू मध्ये एक गम्भीर घटना मानिएको छ ।