विप्लवको चेतावनीः ‘तीन बुँदे कार्यान्वयन नगरे केपी ओलीको योजना पुरा हुँदैन’

काठमाडौं । नेपाल कम्युनिस्ट पार्टीका महासचिव नेत्र विक्रम चन्द ‘विप्लव’ले प्रधानमन्त्री केपी शर्मा ओलीलाई तीन बुँदे सहमति तत्काल कार्यान्वयन गर्न कडा सन्देश दिएका छन् । विप्लवले सहमति बेवास्ता गरिए अब चुप लागेर बस्ने अवस्था नरहने स्पष्ट पारेका छन् ।

मार्क्सवादी अध्ययन केन्द्रले ४७औँ पुष्पलाल स्मृति दिवसको अवसरमा मंगलबार आयोजना काठमाडौंमा गरेको कार्यक्रममा सम्बोधन गर्दै विप्लवले आफूहरू चुनावी प्रतिस्पर्धामा जान तयार रहेको जनाए । ‘हामी चुनाव लड्छौं, जनतालाई भन्छौं— एकचोटि जिताएर हेर्नुस्,’ उनले भने, ‘नेपाल चलाउने कुरा हामी देखाउँछौं, हामी अरुजस्ता होइनौं । दलालहरू हटाएर जनताको शासन कस्तो हुन्छ भन्ने हाम्रो एजेण्डा हो ।’

विप्लवले केपी ओलीलाई लक्षित गर्दै थपे, ‘हामीसँग भएको तीन बुँदे सहमति लागू गर्नुहोस् । लागू नगरे तपाईंले सोचेजस्तो हुने छैन ।’

कार्यक्रममा उनले एमालेप्रति पनि टिप्पणी गरे । कम्युनिस्ट आन्दोलन लामो संघर्ष र आत्मसमीक्षाबाट गुज्रिएको उल्लेख गर्दै उनले भने, ‘एमाले राम्रो बाटोमा हिँडेको भए हामीलाई २०५२ सालमा त्यो कदम चाल्नुपर्ने थिएन ।’

उनको भनाइले एमालेप्रतिको असन्तुष्टि अझै कायमै रहेको संकेत गरेको छ ।