ढाकाको विद्यालयमा विमान दुर्घटनाः मृतकको संख्या २७ पुग्यो

काठमाडौं । बंगलादेशको राजधानी ढाकामा भएको एक विमान दुर्घटनामा परी ज्यान गुमाउनेको संख्या २७ पुगेको छ । मृतकमध्ये २५ जना स्कुले बालबालिका, एक शिक्षक र एक पाइलट रहेको पुष्टि भएको छ ।

बीबीसी बंगलाका अनुसार बंगलादेश सरकारका स्वास्थ्य मामिला प्रमुख सल्लाहकारका सहायक सैदुर रहमानले दुर्घटनामा २७ जनाको मृत्यु भएको जानकारी दिएका हुन् ।

सोमबार माइलस्टोन स्कुल एन्ड कलेजको भवनमा बंगलादेश वायुसेनाको एक ट्रेनर विमान खसेको थियो । दुर्घटनामा ७८ जना घाइते भएका छन् । घाइतेहरूको उपचार राजधानीका विभिन्न अस्पतालमा भइरहेको छ ।

दुर्घटनापछि बंगलादेशको अन्तरिम सरकारले राष्ट्रिय शोकको घोषणा गरेको छ । घटनास्थलमा उद्धार र अनुसन्धान कार्य जारी छ भने घटनाले सम्पूर्ण मुलुकलाई स्तब्ध बनाएको छ ।