संघीय सञ्चित कोषमा दुई खर्ब रुपैयाँभन्दा बढीको घाटा

काठमाडौं । आर्थिक वर्ष २०८०/८१ सकिँदासम्म संघीय सञ्चित कोषको घाटा दुई खर्ब रुपैयाँ नाघेको छ । अर्थ मन्त्रालयले सार्वजनिक गरेको तथ्यांकअनुसार साउन ३२ गतेसम्म कोषमा दुई खर्ब चार अर्ब ९५ करोड ७३ लाख रुपैयाँभन्दा बढी घाटा देखिएको हो ।

सालको प्रारम्भमा उक्त घाटा दुई खर्ब २४ अर्ब ९९ करोड रुपैयाँ थियो । यसरी हेर्दा चालु आर्थिक वर्षमा घाटा करिब २० अर्ब रुपैयाँले घटेको देखिन्छ ।

गत वर्ष सरकारको कुल राजस्व संकलन ११ खर्ब ७८ अर्ब ८२ करोड रुपैयाँ रहेको थियो । त्यसबाहेक, २३ अर्ब ५२ करोड रुपैयाँ अनुदान र चार खर्ब ६६ अर्ब रुपैयाँभन्दा बढी वित्तीय स्रोत व्यवस्थापन गरिएको थियो ।

तर सोही अवधिमा १५ खर्ब २३ अर्ब रुपैयाँभन्दा बढी खर्च गरिएको अर्थ मन्त्रालयको भनाइ छ । यसमा चालु खर्च, पुँजीगत खर्च र वित्तीय व्यवस्था अन्तर्गत गरिएका खर्चहरू समावेश छन् ।