मोबाइल चार्जर हटाउने क्रममा करेन्ट लागेर महिलाको ज्यान गयो

काठमाडौं । खोटाङको वराहपोखरी गाउँपालिकामा मोबाइल चार्जर निकाल्ने क्रममा करेन्ट लागेर एक महिलाको ज्यान गएको छ ।

ज्यान गुमाउनेमा स्थानीय फाक्टाङकी २५ वर्षीया इन्द्रा राई रहेको प्रहरीले जनाएको छ ।

प्रहरीका अनुसार सोमबार राति करिब ८ बजेतिर आफ्नो कोठामा मोबाइल चार्जबाट निकाल्ने क्रममा राईलाई करेन्ट लागेको थियो । करेन्ट लागेपछि उनी अचेत अवस्थामा ढलेकी थिइन् ।

घटना तत्कालै थाहा पाएपछि परिवारका सदस्यहरूले उनलाई उद्धार गरेर नजिकैको स्वास्थ्य संस्थामा पुर्‍याउने प्रयास गरेका थिए । तर उपचारका लागि लैजाने तयारी गर्दै गर्दा उनको मृत्यु भइसकेको थियो ।

प्रहरीले घटनास्थलमा पुगेर प्रारम्भिक विवरण संकलन गरेको छ । मृतकको शव पोष्टमार्टमका लागि जिल्ला अस्पताल, दिक्तेल पठाइएको छ ।

विद्युतसँग जोडिएका उपकरण प्रयोग गर्दा सावधानी अपनाउन स्थानीय प्रशासनले आग्रह गरेको छ । साथै घटनाको विस्तृत अनुसन्धान भइरहेको जिल्ला प्रहरी कार्यालय खोटाङले जनाएको छ ।