तीन प्रमुख दलका नेताहरूको बैठक आज सिंहदरबारमा

काठमाडौं । प्रमुख तीन राजनीतिक दलका शीर्ष नेताहरूबीच आज (शुक्रबार) दिउँसो २ बजे सिंहदरबारस्थित प्रधानमन्त्री तथा मन्त्रिपरिषद्को कार्यालयमा बैठक बस्ने भएको छ । प्रधानमन्त्रीको सचिवालयका अनुसार बैठकका लागि समय र स्थान टुंगो लागेको हो ।

यसअघि बुधबार र बिहीबार बैठक बोलाइएको भए पनि नेताहरूको व्यस्त कार्यतालिकाका कारण बस्न सकेको थिएन ।

संसदमा जारी अवरोध हटाउने, बजेटमाथिको छलफल अगाडि बढाउने तथा विधेयकहरूमाथि आवश्यक निर्णय लिने विषयमा बैठक केन्द्रित रहने जनाइएको छ ।

भिजिट भिसा प्रकरणको छानबिनको मागसहित संसद् अवरुद्ध गरिँदै आएको छ । नेकपा माओवादी केन्द्र संसद् सञ्चालनका पक्षमा देखिए पनि रास्वपा र राप्रपा भने अझै अवरोध हटाउने पक्षमा छैनन् । यही कारण महत्त्वपूर्ण विधेयकहरू अघि बढ्न सकेका छैनन्, र बजेटमाथि पनि व्यवस्थित छलफल हुन सकेको छैन ।