पहिरो खस्दा बीपी राजमार्ग ठप्प, यात्रा गर्नुअघि अवस्था बुझ्न आग्रह

काभ्रे । काभ्रेपलाञ्चोकको रोशी गाउँपालिका क्षेत्रमा पहिरो खसेपछि बीपी राजमार्ग पूर्ण रूपमा अवरुद्ध भएको छ । रोशी गाउँपालिका–९ पिन्थली र रोशी गाउँपालिका–८ गिम्दीबेँसीमा पहिरो खस्दा राजमार्गमा सवारीसाधनको आवागमन ठप्प भएको हो ।

जिल्ला प्रहरी कार्यालय काभ्रेपलाञ्चोकका अनुसार दुवै स्थानमा पहिरो खसेपछि राजमार्ग भएर चल्ने सवारीसाधन बीच बाटोमै रोकिएका छन् । पहिरोका कारण यात्रुहरूलाई आवतजावतमा समस्या भएको छ भने राजमार्ग भएर यात्रा गर्ने सवारीसाधन प्रभावित भएका छन् ।

लगातार वर्षा भइरहेकाले पहिरो पन्छाएर सडक तत्काल सञ्चालनमा ल्याउन कठिन हुने प्रहरीले जनाएको छ । वर्षाका कारण माथिबाट थप पहिरो र लेदो खस्ने जोखिम रहेकाले सडक खुलाउन समय लाग्न सक्ने जिल्ला प्रहरी कार्यालयका सूचना अधिकारी रविन विष्टले जानकारी दिए ।

उनका अनुसार राजमार्गको अवस्था प्रतिकूल रहेकाले यात्रु तथा सवारीचालकले विशेष सावधानी अपनाउन आवश्यक छ । सडक अवरुद्ध भएको अवस्थामा जबर्जस्ती यात्रा गर्दा थप जोखिम निम्तिन सक्ने भएकाले सम्बन्धित निकायबाट सडकको अवस्थाबारे जानकारी लिएर मात्रै यात्रा गर्न प्रहरीले आग्रह गरेको छ ।

बीपी राजमार्ग काभ्रे हुँदै पूर्वी नेपालका विभिन्न जिल्लालाई काठमाडौं उपत्यकासँग जोड्ने प्रमुख सडक मार्ग हो । यस राजमार्गमा वर्षायाम तथा वर्षापछिको समयमा पहिरो खस्ने र सडक अवरुद्ध हुने समस्या देखिँदै आएको छ ।

प्रहरीले वर्षा जारी रहेकाले अनावश्यक यात्रा नगर्न र राजमार्गको पछिल्लो अवस्थाबारे जानकारी लिएर मात्रै आफ्नो यात्रा तय गर्न सर्वसाधारणलाई अनुरोध गरेको छ ।