असोज २३ देखि सार्वजनिक यातायातको अग्रिम टिकट बुकिङ खुल्ने

काठमाडौं । दशैं, तिहार तथा छठ पर्वलाई लक्षित गर्दै सार्वजनिक यातायातको अग्रिम टिकट बुकिङ आगामी २३ असोजदेखि खुला हुने भएको छ । चाडपर्वमा काठमाडौं उपत्यकाबाट ठूलो संख्यामा यात्रु बाहिरिने भएकाले सहज र व्यवस्थित यात्रा सुनिश्चित गर्न यातायात व्यवस्था विभागले सरोकारवाला निकायसँग छलफल गरी यस्तो निर्णय गरेको हो ।

मंगलबार यातायात व्यवस्था विभागमा भएको उच्चस्तरीय बैठकमा यातायात व्यवसायी राष्ट्रिय महासंघ, यातायात श्रमिक संगठन, नेपाल प्रहरी, ट्राफिक प्रहरी तथा नयाँ बसपार्क व्यवस्थापक ल्होत्से बहुउद्देश्यीय प्रालिका प्रतिनिधि सहभागी थिए ।

बैठकपछि अखिल नेपाल यातायात मजदुर संगठनका अध्यक्ष दिपक केसीले २३ असोजदेखि अग्रिम टिकट बुकिङ खुला गर्ने सहमति भएको जानकारी दिए । उनका अनुसार चाडपर्वका बेला यात्रुको चाप अत्यधिक हुने भएकाले समयमै टिकट व्यवस्थापन र यातायात सञ्चालनको तयारी थालिएको हो ।

यस वर्षको दशैंमा मात्रै १० लाखभन्दा बढी यात्रुले काठमाडौं उपत्यका छाड्ने अनुमान गरिएको छ । हाल केही यातायात कम्पनीले मात्र अनलाइनमार्फत टिकट बुकिङ गरिरहेका कारण यात्रुमा अन्योल देखिँदै आएको थियो । विभागको निर्णयसँगै अग्रिम टिकट बुकिङलाई व्यवस्थित र एकरूप बनाउने अपेक्षा गरिएको छ ।

लामो दूरीका बसमा दुई चालक अनिवार्य
बैठकले लामो दूरीमा सञ्चालन हुने सार्वजनिक सवारीसाधनको सुरक्षा व्यवस्थामा पनि विशेष ध्यान दिने निर्णय गरेको छ । अब लामो दूरीका सवारीसाधनमा अनिवार्य रूपमा दुई जना चालक राख्नुपर्ने व्यवस्था कार्यान्वयन गरिने भएको छ ।

यात्रुको विवरण व्यवस्थित राख्न टिकट काट्दा यात्रुको नाम र सम्पर्क नम्बर अनिवार्य रूपमा अभिलेख गर्नुपर्नेछ । त्यस्तै, टिकट काउन्टरमा खटिने कर्मचारीले परिचयपत्रसहित तोकिएको युनिफर्म लगाउनुपर्ने निर्णय गरिएको छ ।

चाडपर्वको समयमा यात्रुको चाप बढेसँगै टिकटमा हुने सम्भावित अनियमितता रोक्न पनि सम्बन्धित निकायले निगरानी बढाउने भएका छन् । तोकिएको भन्दा बढी भाडा असुल गर्ने, टिकटमा कालोबजारी गर्ने वा कृत्रिम अभाव सिर्जना गर्ने व्यवसायी तथा व्यक्तिमाथि कडा कानुनी कारबाही गरिने विभागले जनाएको छ ।

यात्रु सुरक्षाका लागि केन्द्रीय सूचना केन्द्र
यात्राका क्रममा राजमार्गमा हुने दुर्घटना, सडक अवरोध तथा अन्य समस्याबारे तत्काल सूचना आदानप्रदान गर्न केन्द्रीय सूचना केन्द्र सञ्चालनमा ल्याइने भएको छ ।

त्यस्तै, यात्रुवाहक सवारीसाधनमा प्राथमिक उपचार सामग्री, अग्नि नियन्त्रण उपकरण तथा पिउने पानीलगायतका आधारभूत सुविधा अनिवार्य रूपमा उपलब्ध गराउनुपर्ने निर्णय गरिएको छ । लामो दूरीको यात्रामा यात्रुको स्वास्थ्य तथा सुरक्षालाई प्राथमिकतामा राख्दै आवश्यक तयारी गर्न व्यवसायीलाई निर्देशन दिइने भएको छ ।

दशैंको समयमा नयाँ बसपार्क तथा अन्य प्रमुख बसपार्कमा यात्रुको अत्यधिक भीड हुने भएकाले टिकट काउन्टर र बस चढ्ने स्थानमा समेत विशेष व्यवस्थापन गरिनेछ । टिकट नपाउने, बढी भाडा तिर्नुपर्ने तथा भीडका कारण यात्रुले सास्ती भोग्नुपर्ने अवस्था आउन नदिन सुरक्षा निकायलाई प्रभावकारी रूपमा परिचालन गरिने बैठकमा सहभागीहरूले बताएका छन् ।

सरकार, यातायात व्यवसायी, श्रमिक संगठन तथा सुरक्षा निकायबीच समन्वय गरी दशैं–तिहार तथा छठ अवधिको सार्वजनिक यातायातलाई सुरक्षित, भरपर्दो र व्यवस्थित बनाउने प्रतिबद्धता बैठकमा व्यक्त गरिएको छ ।