कांग्रेसको १५औँ महाधिवेशन आजदेखि, खुलामञ्चमा उद्घाटन हुँदै

काठमाडौं । नेपाली कांग्रेसको १५औँ महाधिवेशन आज (असोज १८ गते) देखि काठमाडौंमा सुरु हुँदैछ । महाधिवेशनको उद्घाटन दिउँसो २ः०० बजे टुँडिखेलस्थित खुलामञ्चमा हुने कांग्रेसले जनाएको छ । यसअघि असोज १६ गतेदेखि गर्ने भनिएको महाधिवेशन भारी वर्षाका कारण केही क्षेत्रको अधिवेशन तथा प्रतिनिधि छनोट प्रक्रिया प्रभावित भएपछि दुई दिनपछि सारिएको थियो ।

ऐतिहासिक टुँडिखेलमा हुन लागेको महाधिवेशनलाई कांग्रेसले राजनीतिक र संगठनात्मक रूपमा महत्त्वपूर्ण अवसरका रूपमा लिएको छ । यही स्थलमा कांग्रेसका संस्थापक नेता गणेशमान सिंहले २०४६ सालको जनआन्दोलन सफल भएको घोषणा गरेका थिए । महाधिवेशनको उद्घाटन पार्टी सभापति गगनकुमार थापाले गर्ने कार्यक्रम छ । उद्घाटन समारोहमा कांग्रेसका शीर्ष नेतासँगै विभिन्न राजनीतिक दलका प्रमुख नेताहरूलाई पनि सम्बोधनका लागि आमन्त्रण गरिएको छ ।

महाधिवेशनमा देशभरबाट सात हजार पाँच सयभन्दा बढी प्रतिनिधि सहभागी हुने कांग्रेसले जनाएको छ । प्रवक्ता देवराज चालिसेका अनुसार यसपटकको महाधिवेशनमा नयाँ पुस्ताको उल्लेख्य सहभागिता रहेको छ । वडा तहदेखि विभिन्न चरणमा भएको अधिवेशन प्रक्रियाबाट ठूलो संख्यामा युवा नेतृत्वमा आएका कारण यस महाधिवेशनलाई पुस्तान्तरणको दृष्टिले पनि महत्त्वपूर्ण मानिएको छ ।

कांग्रेसका अनुसार ३५ वर्षमुनिका युवासहित लोकतन्त्र सेनानी, श्रमिक तथा पेसागत क्षेत्र र विदेशमा रहेका नेपालीलाई समेत पहिलोपटक केन्द्रीय समितिमा प्रतिनिधित्वको अवसर दिने व्यवस्था गरिएको छ । ‘ऊर्जाशील कांग्रेस, नयाँ सङ्कल्प’लाई महाधिवेशनको मूल मन्त्र बनाइएको छ । छलफलमार्फत पार्टीको आगामी नीति, कार्यक्रम र कार्यान्वयनको खाका तय गर्ने तयारी कांग्रेसको छ ।

पार्टी प्रवक्ता चालिसेले महाधिवेशनलाई केवल नेतृत्व चयनमा सीमित नगरी संगठनभित्र विधि र पद्धतिको विकास गर्ने अवसरका रूपमा अघि बढाइने बताएका छन् । उनका अनुसार कांग्रेसको विगतको राजनीतिक विरासतलाई भविष्यको नीति र कार्यक्रमसँग जोड्दै समृद्धिको वैचारिक आधार निर्माणमा समेत महाधिवेशन केन्द्रित हुनेछ ।

महाधिवेशन प्रतिनिधिको दर्ता प्रक्रिया शनिबारदेखि पार्टी केन्द्रीय कार्यालय सानेपामा सुरु भएको थियो । प्रतिनिधिले सहभागिता दर्ताका लागि तीन हजार पाँच सय रुपैयाँ शुल्क बुझाउनुपर्ने व्यवस्था गरिएको निर्वाचन समितिले जनाएको छ । देश तथा विदेशबाट प्रतिनिधिहरू काठमाडौं आउने क्रम जारी रहेकाले महाधिवेशनस्थलमा चहलपहल बढेको छ ।

प्रतिनिधिहरूको आवास व्यवस्थापनका लागि प्रत्येक निर्वाचन क्षेत्र, जिल्ला र प्रदेशबाट संयोजक तोकिएको छ । आवाससम्बन्धी विवरण ह्वाट्सएप, एआई नम्बर तथा एसएमएसमार्फत उपलब्ध गराउने व्यवस्था गरिएको आवास व्यवस्थापन समितिले जनाएको छ ।

उद्घाटन समारोहपछि असोज १९ र २० गते बन्दसत्र सञ्चालन हुनेछ। बन्दसत्रमा सभापति, उपसभापति, महामन्त्री र कोषाध्यक्षले छुट्टाछुट्टै प्रतिवेदन प्रस्तुत गर्ने कार्यतालिका छ । प्रतिवेदनमाथि भूगोलका आधारमा प्रतिनिधिहरूलाई समूहमा विभाजन गरी तीन फरक हलमा छलफल गराइनेछ । डिजिटल बोर्डमार्फत प्रतिनिधिहरूले प्रतिवेदन हेर्न र सुन्न सक्ने व्यवस्था मिलाइएको कांग्रेसले जनाएको छ ।

महाधिवेशनसँगै कांग्रेसको आगामी नेतृत्व चयन प्रक्रिया पनि अघि बढ्नेछ । निर्वाचन समितिले असोज १९ गते दिउँसो २ः०० बजेदेखि ६ः०० बजेसम्म उम्मेदवारी मनोनयनको समय निर्धारण गरेको छ । उम्मेदवारी दर्ता राष्ट्रिय सभागृहमा हुनेछ । निर्वाचनसम्बन्धी कार्यक्रम आवश्यकताअनुसार संशोधन हुनसक्ने समितिले जनाएको छ ।

महाधिवेशनमा सहभागी हुने प्रतिनिधिका सवारीसाधन व्यवस्थापनका लागि पनि छुट्टै पार्किङ क्षेत्र तोकिएको छ । निजी कार तथा मोटरसाइकलका लागि भृकुटीमण्डप, राष्ट्रिय सभागृह र पुरानो बसपार्क क्षेत्रमा पार्किङको व्यवस्था गरिएको छ भने ठूला बसका लागि माइतीघरदेखि भद्रकालीसम्मको एक लेन प्रयोग गरिनेछ ।

महाधिवेशनका गतिविधि तथा निर्णयबारे नियमित जानकारी दिन खुलामञ्चमै मिडिया सेन्टर स्थापना गरिएको छ । महाधिवेशन अवधिभर सूचना अद्यावधिक तथा सञ्चारकर्मीसँग ब्रिफिङ गर्ने व्यवस्था मिलाइएको कांग्रेसले जनाएको छ ।