कांग्रेसको १५औँ महाधिवेशनको नयाँ कार्यतालिका सार्वजनिक, उद्घाटन १८ असोजमा

काठमाडौं । नेपाली कांग्रेसको केन्द्रीय निर्वाचन समितिले पार्टीको १५औँ महाधिवेशनको संशोधित कार्यतालिका सार्वजनिक गरेको छ । समितिले मंगलबार प्रेस विज्ञप्तिमार्फत नयाँ कार्यतालिका सार्वजनिक गरेको हो ।

संशोधित कार्यतालिकाअनुसार कांग्रेसको १५औँ महाधिवेशनको उद्घाटन समारोह असोज १८ गते हुने भएको छ । काठमाडौंको खुलामञ्चमा दिउँसो २ः०० बजे उद्घाटन समारोह सुरु हुने निर्वाचन समितिले जनाएको छ ।

विज्ञप्ति अनुसार महाधिवेशनको बन्द सत्र तथा अन्य कार्यक्रम असोज १९ र २० गते सञ्चालन हुनेछ ।

त्यसैगरी महाधिवेशनको निर्वाचन कार्यक्रमका लागि असोज २१ र २२ गते तोकिएको छ । निर्वाचनसम्बन्धी अन्य कार्यक्रम तथा विस्तृत कार्यतालिका भने पछि सार्वजनिक गरिने समितिले जनाएको छ ।

महाधिवेशनमा सहभागी हुने प्रतिनिधिको व्यवस्थापनका लागि पनि समितिले समयसीमा निर्धारण गरेको छ । क्षेत्रीय अधिवेशन असोज १५ गतेभित्र सम्पन्न गरी महाधिवेशन प्रतिनिधिहरूको नामावली केन्द्रीय निर्वाचन समितिमा पठाइसक्न निर्देशन दिइएको छ ।

महाधिवेशन प्रतिनिधिको रजिस्ट्रेसन तथा दर्ताका लागि असोज १६ र १७ गतेको समय तोकिएको छ । प्रतिनिधिको नामावली संकलन तथा दर्ता प्रक्रिया पूरा भएपछि महाधिवेशनका अन्य तयारी अघि बढाइने निर्वाचन समितिले जनाएको छ ।

यसअघि असोज १६ देखि १९ गतेसम्म महाधिवेशन गर्ने कार्यतालिका तय गरिएको थियो । प्रतिकूल मौसमका कारण विभिन्न तहका अधिवेशन प्रभावित भएपछि कांग्रेसले महाधिवेशनको मिति संशोधन गरेको हो ।