रसुवाका दुर्गम बाढी प्रभावित क्षेत्रमा तामाङ समाज आयरल्यान्डको राहत

काठमाडौं । रसुवाको दुर्गम क्षेत्रमा भोटेकोसी नदीमा आएको बाढीबाट प्रभावित परिवारका लागि उद्धार तथा राहत वितरण अभियान जारी रहेको छ । गत भदौ १० गते आएको विनाशकारी बाढीबाट प्रभावित क्षेत्रमा नेपाल तथा विदेशमा रहेका नेपाली समुदाय, विभिन्न संघसंस्था र सामाजिक अभियन्ताले सहयोगलाई निरन्तरता दिइरहेका छन् ।

यसै क्रममा तामाङ समाज आयरल्यान्डले रसुवाको आमाछोदिङमो गाउँपालिका–३ गल्लाङलगायत बाढी प्रभावित दुर्गम क्षेत्रमा राहत तथा सहयोग पुर्‍याइरहेको छ । सडक तथा यातायातको असहजताका कारण राहत सामग्री पुर्‍याउन कठिन भइरहेका स्थानमा समेत समाजले सहयोग पुर्‍याएको हो ।

विशेषगरी प्रभावित क्षेत्रमा राहत पुर्‍याउने र वितरण व्यवस्थापनमा स्थानीय अभियन्ता अञ्जलि लोप्चनको भूमिका महत्वपूर्ण रहेको बताइएको छ । स्थानीय आवश्यकताका आधारमा राहत सामग्री प्रभावित परिवारसम्म पुर्‍याउन उनले समन्वय गरिरहेकी छन् ।

राहत वितरणमा आमाछोदिङमो गाउँपालिका–३ का वडा अध्यक्ष धर्म तामाङ तथा वडा सचिव प्रेम गोलेले पनि समन्वय तथा सहजीकरण गरेका छन् । स्थानीय जनप्रतिनिधि र अभियन्ताको समन्वयमा प्रभावित परिवारको पहिचान गरी राहत वितरण गरिएको बताइएको छ ।

काठमाडौंबाट समेत विभिन्न संघसंस्था तथा व्यक्तिहरूले राहत सामग्री पठाइरहे पनि बाढी र पहिरोका कारण सडक तथा बाटोको अवस्था कमजोर हुँदा दुर्गम बस्तीमा राहत पुर्‍याउन चुनौती देखिएको छ । यस्तो अवस्थामा स्थानीय स्तरबाट गरिएको समन्वय र विदेशमा रहेका नेपाली समुदायको सहयोगले प्रभावित परिवारलाई राहत पुग्न सहज भएको छ ।

अभियन्ता लोप्चनका अनुसार आमाछोदिङमो तथा गोल्जुङलगायत क्षेत्रमा आवश्यकताअनुसार राहत पुर्‍याउने प्रयास भइरहेको छ । भौगोलिक कठिनाइका कारण बाह्य क्षेत्रबाट सहज रूपमा पुग्न नसक्ने बस्तीलाई प्राथमिकतामा राखेर सहयोगलाई निरन्तरता दिइएको उनले बताइन् ।

बाढीपछि प्रभावित क्षेत्रमा खाद्यान्न, लत्ताकपडा तथा अन्य अत्यावश्यक सामग्रीको आवश्यकता कायमै रहेको स्थानीयको भनाइ छ । विपद्को समयमा देश–विदेशबाट प्राप्त सहयोगले प्रभावित परिवारलाई तत्कालको संकट व्यवस्थापनमा महत्वपूर्ण टेवा पुगेको स्थानीयले बताएका छन् ।

तामाङ समाज आयरल्यान्डले आगामी दिनमा पनि आवश्यकताका आधारमा प्रभावित क्षेत्रका परिवारलाई सहयोग जारी राख्ने जनाएको छ ।