भोटेकोशी बाढीमा मृत्यु हुनेको संख्या २२ पुग्यो, ६५ घाइतेको उद्धार

काठमाडौं । रसुवाको भोटेकोशी नदीमा आएको भीषण बाढीका कारण मृत्यु हुनेको संख्या २२ पुगेको छ । बागमती प्रदेश प्रहरी कार्यालयले सार्वजनिक गरेको पछिल्लो विवरणअनुसार रसुवा, नुवाकोट, धादिङ र चितवनमा गरी २२ जनाको मृत्यु भएको हो ।

प्रहरीका अनुसार सबैभन्दा बढी मानवीय क्षति नुवाकोट र धादिङमा भएको छ । नुवाकोटमा पाँच महिला र छ पुरुष गरी ११ जनाको मृत्यु भएको छ भने धादिङमा पाँच महिला, दुई पुरुष र पहिचान खुल्न नसकेका दुई जनासहित नौ जनाले ज्यान गुमाएका छन् ।

त्यस्तै, रसुवामा एक पुरुषको मृत्यु भएको छ भने चितवनमा एक महिलाको ज्यान गएको प्रहरीले जनाएको छ ।

बाढी तथा त्यसबाट उत्पन्न विपद्मा परी घाइते भएका ६५ जनाको उद्धार गरिएको छ । उद्धार गरिएकामध्ये रसुवाबाट ४३, नुवाकोटबाट १९ र धादिङबाट तीन जना रहेका छन् ।

उद्धार गरिएका घाइतेमध्ये ६ जनालाई काठमाडौं ल्याइएको छ भने ३६ जना धुन्चेमा उपचार तथा निगरानीमा रहेका छन् । अन्य घाइतेको नुवाकोटका विभिन्न स्थानबाट उद्धार गरिएको प्रहरीले जनाएको छ । उद्धार गरिएकामध्ये एक जना प्रहरीसमेत रहेको विवरणमा उल्लेख छ ।

भोटेकोशीमा आएको बाढीपछि नदी आसपासका क्षेत्रमा व्यापक क्षति पुगेको छ । बाढी प्रभावित क्षेत्रमा अझै खोजी तथा उद्धार कार्य जारी रहेकाले मृतक तथा घाइतेको संख्या थप बढ्न सक्ने सुरक्षा निकायले जनाएको छ ।