काठमाडौंमा खिजिदेम्बा गाउँपालिकाको तीन दिने एकीकृत सेवा शिविर सुरु

काठमाडौं । ओखलढुङ्गाको खिजिदेम्बा गाउँपालिकाले काठमाडौंमा बसोबास गर्दै आएका आफ्ना नागरिकलाई लक्षित गर्दै तीन दिने एकीकृत सेवा शिविर सञ्चालन गरेको छ । गाउँपालिकाले सोमबारदेखि काठमाडौंको जोरपाटीस्थित शेर्पा पार्टी प्यालेसमा शिविर सञ्चालन गरेको हो ।

आजबाट सुरु भएको कार्यक्रममा साउन २७ गतेसम्म सञ्चालन हुने शिविर बिहान ११ बजेदेखि सुरु हुने गाउँपालिकाले जनाएको छ । काठमाडौंमा रहेका खिजिदेम्बावासीलाई गाउँपालिकाबाट उपलब्ध हुने विभिन्न सेवा–सुविधा सहज रूपमा उपलब्ध गराउने उद्देश्यले शिविर आयोजना गरिएको हो ।

शिविरसँगै सार्वजनिक सुनुवाइ तथा सुझाव संकलन कार्यक्रमसमेत आयोजना गरिएको छ । कार्यक्रममा स्थानीयवासीका समस्या, गुनासा, सुझाव तथा अपेक्षाबारे प्रत्यक्ष रूपमा जानकारी लिने र गाउँपालिकाको सेवा प्रवाहलाई थप प्रभावकारी बनाउने विषयमा छलफल गरिएको छ ।

कार्यक्रमको अध्यक्षता खिजिदेम्बा गाउँपालिकाका अध्यक्ष गम्बु शेर्पाले गरेका छन् । कार्यक्रममा संघीय सांसद विश्वराज पोखरेल, कोशी प्रदेशका भौतिक पूर्वाधार विकास मन्त्री प्रदीपकुमार सुनुवारलगायत गाउँपालिकाका उपाध्यक्ष सुशिला तामाङ तथा वडा नं. १ देखि ९ सम्मका वडाध्यक्षहरूको उपस्थिति रहेको थियो ।

गाउँपालिकाका प्रतिनिधिहरूले काठमाडौंमा बसोबास गरिरहेका नागरिकलाई गाउँपालिकाबाट प्राप्त गर्नुपर्ने सेवा लिन गाउँसम्म पुग्नुपर्ने बाध्यता कम गर्ने उद्देश्यले शिविर आयोजना गरिएको बताएका छन् । नागरिकसँग प्रत्यक्ष संवाद गर्दै उनीहरूका आवश्यकता र समस्यालाई गाउँपालिकाको आगामी योजना तथा कार्यक्रममा समेट्नसमेत शिविर उपयोगी हुने अपेक्षा गरिएको छ ।

गाउँपालिकाले काठमाडौंमा रहेका सम्पूर्ण खिजिदेम्बावासीलाई शिविरमा उपस्थित भई उपलब्ध सेवा लिन तथा आफ्ना सुझाव, गुनासा र अपेक्षा राख्न आग्रह गरेको छ । गाउँपालिकाले नागरिकको सहभागिताले स्थानीय सरकार र नागरिकबीचको सम्बन्ध थप मजबुत बनाउन सहयोग पुग्ने विश्वास व्यक्त गरेको छ ।