शिक्षा विधेयकविरुद्ध निजी विद्यालय सञ्चालकको आन्दोलन घोषणा

काठमाडौं । संसदको शिक्षा, स्वास्थ्य तथा सूचना प्रविधि समितिबाट पारित भएको विद्यालय शिक्षा विधेयकप्रति असन्तुष्टि जनाउँदै निजी विद्यालय सञ्चालक संगठनहरू आन्दोलनमा उत्रने भएका छन् ।

निजी तथा आवासीय विद्यालयहरूको छाता संगठन प्याब्सन र एनप्याब्सनले संयुक्त रूपमा आन्दोलनका चरणबद्ध कार्यक्रम सार्वजनिक गरेका हुन् ।

प्याब्सनका अध्यक्ष कृष्णप्रसाद अधिकारी र एनप्याब्सनका अध्यक्ष सुभाष न्यौपानेको संयुक्त हस्ताक्षरयुक्त विज्ञप्तिमा, सबै तहका संगठन इकाइलाई आन्दोलनको पूर्वतयारी सुरु गर्न निर्देशन दिइएको छ ।

कार्यक्रमअनुसार, आज पहिलो दिन देशभरका स्थानीय तहका प्रमुख र शिक्षा शाखामा ज्ञापनपत्र बुझाइँदैछ । शुक्रबार जिल्ला प्रशासन कार्यालय, जिल्ला समन्वय समिति तथा शिक्षा विकास र समन्वय इकाइमा ज्ञापनपत्र बुझाइनेछ ।

आगामी भदौ १ गते प्रदेशका मुख्यमन्त्री र सामाजिक विकास मन्त्रीलाई, भदौ २ गते भने सम्बन्धित क्षेत्रका सांसदलाई ज्ञापनपत्र बुझाउने योजना छ । सोही दिन राष्ट्रिय परिषद्को भर्चुअल बैठकमार्फत सुझाव संकलन गर्ने निर्णय पनि गरिएको छ ।

यसअघि, भदौ ३ गते पालिका, ४ गते जिल्ला र ५ गते प्रदेशस्तरीय आन्दोलन तयारी बैठक हुनेछन् । भदौ ६ गतेदेखि ७ गतेसम्म भने केन्द्र र प्रदेशस्तरमा सरोकारवालासँग अन्तरक्रिया कार्यक्रम आयोजना गरिने प्याब्सन–एनप्याब्सनले जनाएको छ ।