३८ जिल्लाका नदीमा बहाव उल्लेख बढ्ने सम्भावना, सतर्कता अपनाउन आग्रह

काठमाडौं । देशका विभिन्न नदी तथा खोलामा आज बाढीको बहाव बढ्न सक्ने भन्दै बाढी पूर्वानुमान महाशाखाले सतर्क रहन आग्रह गरेको छ । विशेषगरी रसुवा र नुवाकोट भएर बग्ने भोटेकोसी र त्रिशूली नदीमा आकस्मिक बाढीको उच्च जोखिम रहेको महाशाखाले जनाएको छ ।

आज बिहान जारी गरिएको बाढीसम्बन्धी बुलेटिनअनुसार काठमाडौं उपत्यकासहित देशका ३८ जिल्ला र आसपासका क्षेत्रमा बहने ससाना नदी तथा खोलाको बहाव उल्लेख्य रूपमा बढ्ने सम्भावना छ । ती नदीमा आकस्मिक बाढीको मध्यम जोखिम रहेको महाशाखाको आँकलन छ ।

दोलखा, सिन्धुली, काभ्रेपलाञ्चोक, ललितपुर, भक्तपुर, काठमाडौं, सिन्धुपाल्चोक, धादिङ, मकवानपुर, चितवन, नवलपरासी पूर्व, नवलपरासी पश्चिम, गोरखा, तनहुँ, लमजुङ, कास्की, स्याङ्जा, पर्वत, म्याग्दी, बागलुङ, रुकुम पश्चिम, जाजरकोट, सुर्खेत, दैलेख, अछाम, कालीकोट, बाजुरा, बझाङ, बाँके, बर्दिया, दार्चुला, बैतडी, डोटी, डडेल्धुरा, कैलाली र कञ्चनपुरमा साना नदी तथा खोलाको बहाव बढ्ने पूर्वानुमान गरिएको छ ।

महाशाखाका अनुसार यी जिल्लामा बहाव बढेसँगै आकस्मिक बाढीको मध्यम जोखिम हुनसक्ने भएकाले नदी तथा खोलाको आसपासका बासिन्दालाई सावधानी अपनाउन आवश्यक छ ।

यस्तै, रसुवा र नुवाकोट भएर बग्ने भोटेकोसी, त्रिशूलीलगायतका नदी तथा ससाना खोलामा भने बहाव उल्लेख्य बढ्ने र आकस्मिक बाढीको उच्च सम्भावना रहेको महाशाखाले जनाएको छ ।

महाशाखाले नदी किनार तथा तल्लो तटीय क्षेत्रमा बसोबास गर्ने नागरिकलाई बाढीको सम्भावनालाई ध्यानमा राख्दै आवश्यक सतर्कता अपनाउन आग्रह गरेको छ ।