क्रोएसियाको जितसँगै अन्तिम ३२ मा प्रवेश, इंग्ल्यान्ड समूह विजेता

काठमाडौं । फिफा विश्वकप २०२६ अन्तर्गत समूह ‘एल’को अन्तिम खेलमा क्रोएसियाले घानामाथि २–१ को रोमाञ्चक जित निकाल्दै नकआउट चरणमा स्थान सुरक्षित गरेको छ ।

फिलाडेल्फियामा सम्पन्न खेलमा क्रोएसियाका लागि पेटार सुचित र निकोला भ्लासिचले एक–एक गोल गरे । घानाका डेरिक लुकासेनले एक गोल फर्काए पनि टोलीलाई हारबाट जोगाउन सकेनन् ।

यस जितसँगै क्रोएसियाले समूहमा उपविजेताको रूपमा अन्तिम ३२ मा स्थान बनायो । यसअघि नै इंग्ल्यान्ड समूह विजेता बन्दै नकआउट चरणमा पुगिसकेको थियो ।

यता, समूहको अर्को खेलमा इंग्ल्यान्डले पानामालाई २–० ले पराजित गर्दै सात अंकसहित समूह शीर्षस्थान कायम राख्यो । न्युयोर्कमा भएको खेलमा इंग्ल्यान्डले सुरुदेखि नै खेल नियन्त्रणमा राख्दै सहज जित दर्ता गरेको हो ।

इंग्ल्यान्डले पहिलो खेलमा क्रोएसियालाई ४–२ ले हराएको थियो भने दोस्रो खेलमा घानासँग गोलरहित बराबरी खेलेको थियो । अन्तिम खेलमा पानामालाई पराजित गर्दै इंग्ल्यान्डले समूह विजेताको यात्रा पूरा गर्‍यो ।

यस हारसँगै पानामाको विश्वकप यात्रा समूह चरणमै समाप्त भएको छ भने घानाको दोस्रो चरण पुग्ने सम्भावना केही बाँकी छ ।