उत्कृष्ट कमब्याक गर्दै लुम्बिनी लायन्स एनपीएल सिजन–२ को च्याम्पियन

काठमान्डु । नेपाल प्रिमियर लिग (एनपीएल) टी२० क्रिकेट सिजन–२ को उपाधि लुम्बिनी लायन्सले जितेको छ । फाइनलमा सुदूरपश्चिम रोयल्सलाई पराजित गर्दै लुम्बिनीले ऐतिहासिक कमब्याकसहित उपाधि जितेको हो ।

लिग चरणको सुरुवातमा कमजोर देखिएको लुम्बिनीले चौथो खेलसम्म तीन हार बेहोर्दा दबाबमा थियो । तर त्यसपछि लगातार उत्कृष्ट प्रदर्शन गर्दै लिग चरणका अन्तिम तीन खेलसहित कुल ६ खेलमा जित निकाल्दै टोलीले उपाधि जित्न सफल भयो । यस उपलब्धिलाई एनपीएल इतिहासकै उत्कृष्ट कमब्याकमध्ये एक मानिएको छ ।

सुदूरपश्चिम रोयल्स भने लगातार दोस्रो सिजन पनि उपविजेतामै सीमित भयो । पहिलो सिजनमा पनि सुदूरपश्चिम फाइनलमा पराजित भएको थियो ।

फाइनलमा लुम्बिनीको सहज जित
त्रिवि अन्तर्राष्ट्रिय क्रिकेट रंगशालामा सम्पन्न फाइनलमा टस हारेर ८६ रनको लक्ष्य पछ्याएको लुम्बिनीले ८ ओभर ६ बलमै ४ विकेट गुमाउँदै लक्ष्य पूरा गर्‍यो । यो जारी सिजनमा सबैभन्दा कम ओभरमा लक्ष्य पूरा भएको पहिलो खेल हो । यसअघि लिग चरणमा विराटनगर किङ्सले ११ ओभर ५ बलमा सुदूरपश्चिमको लक्ष्य भेटाएको थियो ।

लुम्बिनीको जितमा ओपनर दिनेश अधिकारीले आक्रामक ब्याटिङ गरे । उनले १३ बलमा १ चौका र ५ छक्काको सहयोगमा ४२ रन जोडे । कप्तान रोहित पौडेलले १६ रन बनाए भने डी’आर्सी सर्टले १४ रन जोडे । सन्दीप जोरा शून्यमै आउट भए भने दिलिप नाथ १ रनमा अविजित रहे ।

सुदूरपश्चिम बलिङमा पनि कमजोर
ब्याटिङमा कमजोर प्रदर्शन गरेको सुदूरपश्चिम बलिङमा पनि प्रभाव जमाउन सकेन । कप्तान दीपेन्द्र सिंह ऐरीले २ ओभरमा २९ रन खर्चिँदै १ विकेट लिए । स्कट कुगेलेइजनले २ ओभरमा २२ रन खर्चिए तर विकेट लिन सकेनन् । हर्मित धामीले सर्वाधिक २ विकेट लिए भने दीपेन्द्र र अभिनाश बोहोराले समान १–१ विकेट हात पारे ।

रोहित पौडेल सर्वोत्कृष्ट नेपाली खेलाडी
लुम्बिनी लायन्सका कप्तान रोहित पौडेल सर्वोत्कृष्ट नेपाली खेलाडी घोषित भए । उपाधि जिताउन निर्णायक भूमिका खेलेका रोहितले यो उपलब्धिसँगै कार पुरस्कार प्राप्त गरे ।

फाइनल खेलमा उनले ३ विकेट लिएका थिए । सम्पूर्ण प्रतियोगितामा रोहितले ९ विकेट लिँदै बलिङमा पनि प्रभावशाली प्रदर्शन गरे । ब्याटिङतर्फ उनले १० खेलमा २७६ रन बनाउँदै सर्वाधिक रन बनाउने नेपाली खेलाडी बने । उत्कृष्ट ब्याटर घोषित हुँदै उनले मोटरसाइकल पुरस्कार पनि पाए ।

तीन खेलाडीले जिते बाइक
एनपीएल सिजन–२ मा तीन खेलाडीले मोटरसाइकल पुरस्कार जितेका छन् । विराटनगर किङ्सका कप्तान सन्दीप लामिछाने, लुम्बिनी लायन्सका शेर मल्ल र कप्तान रोहित पौडेलले बाइक प्राप्त गरे ।

शेर मल्ल ‘बेस्ट राइजिङ खेलाडी’ घोषित हुँदै बाइक जित्न सफल भए । पुरस्कार पाएपछि उनले भने, “यो मेरो जीवनकै पहिलो बाइक हो ।”
उत्कृष्ट बलर घोषित सन्दीप लामिछानेले पनि बाइक पुरस्कार पाए ।