अपराजित रहँदै सुदूरपश्चिम रोयल्स क्वालिफायरमा, चितवन ४९ रनले पराजित

काठमान्डु । नेपाल प्रिमियर लिग (एनपीएल) को दोस्रो सिजनमा सुदूरपश्चिम रोयल्सले लिग चरणमै शीर्ष दुई स्थान सुनिश्चित गर्दै क्वालिफायरमा प्रवेश गरेको छ । कीर्तिपुरस्थित त्रिवि मैदानमा बिहीबार भएको दोस्रो खेलमा चितवन राइनोजलाई ४९ रनले हराउँदै सुदूरपश्चिमले यस सिजन लगातार छैटौँ जित दर्ता गर्‍यो ।

१७० रनको लक्ष्य पछ्याउन मैदान उत्रिएको चितवन १७.१ ओभरमा १२० रनमै समेटियो । यससँगै १२ अंकसहित सुदूरपश्चिम शीर्ष स्थानमा रहँदै मंगलबार हुने पहिलो क्वालिफायरमा प्रतिस्पर्धा गर्ने छ । जित हात पार्न सकेमा टोली फाइनलमा पुग्नेछ, पराजय भए पनि दोस्रो क्वालिफायरमार्फत अर्को मौका पाउनेछ ।

सुदूरपश्चिमको आजको जितसँगै विराटनगर किंग्स पनि प्लेअफमा पुगेको छ । यसअघि नै काठमान्डु गुर्खाजले प्लेअफ स्थान सुनिश्चित गरिसकेको थियो । अब प्लेअफमा तीन टोलीको सहभागिता पक्का भइसकेको छ—सुदूरपश्चिम, काठमान्डु र विराटनगर ।

बाँकी एक स्थानका लागि चितवन, लुम्बिनी लायन्स, पोखरा एभेन्जर्स र जनकपुर बोल्ट्सबीच प्रतिस्पर्धा रहनेछ । भोलि हुने खेलमा लुम्बिनीले जनकपुरलाई हराए प्लेअफमा पुग्नेछ, जसअनुसार चितवन, पोखरा र जनकपुर बाहिरिनेछन् । लुम्बिनी पराजित भए बाँकी तीनै टोलीका लागि सम्भावना खुला रहनेछ । चितवनले अन्तिम खेल पोखरासँग खेल्नेछ भने जनकपुरले कर्णालीसँग प्रतिस्पर्धा गर्नेछ ।

चितवनका ब्याटरहरूले बिहीबारको महत्वपूर्ण खेलमा प्रभाव जमाउन सकेनन् । अर्जुन साउद १६ रनमा आउट भए भने डेभिड मलान र सइफ जइब ६–६ रनमै पेभेलियन फर्किए । रवी बोपाराले २९ रन जोडे भने कप्तान कुशल मल्लले १५ रन बनाउँदै पेभिलियन फर्के । देव खनालले २८ रन बनाए ।

सुदूरपश्चिमका पुनित मेहराले ३ विकेट लिए ।

यसअघि टस जितेर फिल्डिङ रोजेको चितवनकाविरुद्ध सुदूरपश्चिमले ४ विकेटको क्षतिमा १६९ रनको प्रतिस्पर्धात्मक योगफल बनाएको थियो । क्रिस लिनले ५६ बलमा ७५ रनको शानदार पारी खेले, जसमा ५ चौका र ३ छक्का सामेल थिए। १७औँ ओभरको अन्त्यमा उनी रिटायर्ड हट भए । ओपनर विनोद भण्डारी २१ रनमा आउट भए। इशान पाण्डे र हर्मित सिंह १–१ रनमै फर्किए ।

डेब्यू खेल खेलेका पुनित मेहराले १३ रन जोडे । अन्त्यतिर दीपेन्द्रसिंह ऐरीले १४ बलमा अविजीत २४ रन र आरिफ शेखले १६ बलमा अविजीत २४ रन जोडी टोलीलाई बलियो अवस्थामा पुर्‍याए ।

चितवनका जइबले २ विकेट लिए भने जर्ज स्कृमश र रञ्जितले एक–एक विकेट हात पारे ।