एसीसी यू–१९ प्रिमियर कपः यादवको शानदार शतकसहित नेपालको विजयी सुरुवात

काठमान्डु । ओपनर निरजकुमार यादवको उत्कृष्ट शतकको बलमा नेपालले युएईमा जारी एसीसी पुरुष यू–१९ प्रिमियर कपमा साउदी अरेबियामाथि प्रभावशाली जित निकाल्दै प्रतियोगितामा विजयी यात्रा सुरु गरेको छ ।

मंगलबार अजमानमा भएको खेलमा नेपालले साउदीलाई ८ विकेटले पराजित गर्दै पहिलो खेलमै २ अंक सुरक्षित गर्‍यो । लगातार दोस्रो हार बेहोरेको साउदी भने दबाबमा परेको छ ।

२०७ रनको लक्ष्य पछ्याउँदै मैदान उत्रिएको नेपाली टोलीले ३०.४ ओभरमै लक्ष्य पार गर्‍यो । दोस्रो विकेटका लागि निरज यादव र निश्चल क्षेत्रीबीच बनेको १५५ रनको साझेदारी नेपालका लागि खेल घुमाउने क्षण बन्यो ।

निरजकुमारले ९० बलमा १३ चौका र १ छक्कासहित ११४ रनको उत्कृष्ट पारी खेले । सुरुवाती साझेदार वंश क्षेत्रीले २० बलमा ३० रन जोडे भने निश्चल क्षेत्री ६६ रनमा अविजित रहे । सिवरिन श्रेष्ठले पनि १ रन योगदान गरे ।

टस जितेर फिल्डिङ रोजेको नेपालका बलरहरूले साउदीलाई २० ओभरमा ९ विकेटको क्षतिमा २१८ रनमै रोकिदिए । अशोक धामीले २ विकेट लिए भने दयानन्द मण्डल, सुशीलबहादुर रावल, सिरविन श्रेष्ठ र दर्स सोनारले एक–एक विकेट हात पारे ।

यस जितसँगै नेपाल समूह ए को शीर्ष स्थानमा उक्लिएको छ । एक जित र एक हारसहित हङकङ २ अंकमा दोस्रो स्थानमा रहेको छ ।

नेपालले समूह चरणको अन्तिम खेल बिहीबार हङकङसँग खेल्नेछ । सो खेल जिते नेपाल सेमिफाइनलमा प्रवेश सुनिश्चित गर्नेछ ।