पूर्वगृहमन्त्री रमेश लेखक पक्राउ, ओली निवास घेराबन्दीमा

काठमाडौं । नेपाली कांग्रेसका नेता तथा पूर्वगृहमन्त्री रमेश लेखकलाई प्रहरीले पक्राउ गरेको छ । भक्तपुरको कटुन्जेस्थित आफ्नै निवासमा सुतिरहेका बेला प्रहरीले उनलाई नियन्त्रणमा लिएर काठमाडौंतर्फ लगेको भक्तपुर प्रहरी स्रोतले जनाएको छ ।

काठमाडौं उपत्यका अपराध अनुसन्धान कार्यालयको टोलीले उनलाई नियन्त्रणमा लिएको हो । भदौ २३ र २४ गते भएको जेनजी आन्दोलनका क्रममा भएको मानवीय तथा भौतिक क्षतिको छानबिन गर्न गठित जाँचबुझ आयोगको प्रतिवेदनका आधारमा लेखकलाई पक्राउ गरिएको जनाइएको छ ।

यसैबीच, पूर्वप्रधानमन्त्री तथा नेकपा (एमाले) का अध्यक्ष केपी शर्मा ओलीलाई पनि पक्राउ गर्ने तयारी प्रहरीले गरेको छ । प्रहरीका अनुसार मध्यरातदेखि नै भक्तपुरको गुण्डुस्थित ओली निवास वरपर सुरक्षा घेरा कडा पारिएको छ ।

प्रहरी टोली पुग्दा ओली सुतिसकेका कारण उनलाई तत्काल पक्राउ नगरिएको र उठ्नेबित्तिकै नियन्त्रणमा लिने तयारी रहेको स्रोतले जनाएको छ । पक्राउपछि उनलाई महाराजगन्जस्थित प्रहरी प्रतिष्ठानमा राखिने र थप कानुनी प्रक्रिया आइतबार पूरा गरिने बताइएको छ ।

प्रहरी महानिरीक्षक (आईजीपी) को नक्सालस्थित निवासमा गृहमन्त्री सुधन गुरुङसहित मध्यरातसम्म भएको छलफलपछि गृह मन्त्रालयले ओलीलाई पक्राउ गर्न लिखित आदेश दिएको र सोहीअनुसार प्रहरी परिचालन गरिएको जनाइएको छ ।