बार्सिलोनाको पुनरागमन जित, ओभिडोमाथि ३–१ को नतिजा

काठमाडौं । स्पेनिस ला लिगामा बार्सिलोनाले ओभिडोविरुद्ध ३–१ को प्रभावशाली पुनरागमन जित निकालेको छ ।

खेलको पहिलो हाफमा ओभिडोले अप्रत्याशित अग्रता लिएको थियो । बार्सिलोनाका गोलकिपर जोन गार्सियाको गल्तीमा अल्बर्टो रेइनाले टाढैबाट प्रहार गर्दै गोल गरेका थिए । गार्सियाले डिबक्स बाहिरै बल कासाडोलाई दिन खोज्दा रेइनाले मौकाको सदुपयोग गरेका हुन् ।

तर दोस्रो हाफमा बार्सिलोनाले खेलको लयमा फर्किको थियो । ५६औँ मिनेटमा फेरान टोरेसको प्रहार पोलमा ठोक्किएपछि फर्किएको बललाईलाई एरिक गार्सियाले गोलमा परिणत गर्दै बराबरी गरे ।

७०औँ मिनेटमा फ्रेन्की डे जोङको पासमा रोबर्ट लेवान्डोव्स्कीले हेडर गोल गर्दै बार्सिलोनालाई अग्रता दिलाए । त्यसपछि ८८औँ मिनेटमा मार्कस रासफोर्डले लिएको कर्नरलाई रोनाल्ड अराउजोले हेड गर्दै स्कोर ३–१ बनाए । यो रासफोर्डको लिगमा लगातार तेस्रो असिस्ट थियो ।

ओभिडोले अन्तिमतिर गरेको प्रहार सान्त्वना मात्रै रह्यो । ६ खेलमा जम्मा ३ अंकसहित ओभिडो रेलिगेसन क्षेत्रमा छ ।

जितसँगै बार्सिलोना अंक तालिकामा दोस्रो स्थानमा पुगेको छ । बार्सिलोना शिर्ष स्थानमा रहेको रियल म्याड्रिडभन्दा २ अंकले मात्र पछाडि छ । रियलले अहिलेसम्मका सबै खेल जितेको छ भने बार्सिलोनाले एक खेल बराबरी र बाँकीमा जित दर्ता गरेको छ ।