छैठौं शुभकामना भेट्रान्स दौड सम्पन्न, विभिन्न उमेर समूहका धावक सम्मानित

काठमाडौं । छैठौं शुभकामना भेट्रान्स दौड प्रतियोगिता शनिबार सम्पन्न भएको छ । त्रिपुरेश्वरस्थित दशरथ रंगशालाबाट सुरु भएको दौड सुन्धारा, रत्नपार्क, जमल, केशरमहल, दरबारमार्ग, सहिदगेट हुँदै पुनः रंगशालामा आएर समाप्त भएको हो ।

बैकुण्ठ मानन्धर खेलकुद नेपाल र प्रयास मञ्च नेपालको संयुक्त आयोजनामा भएको प्रतियोगितामा विभिन्न उमेर समूहका १३० धावकले सहभागिता जनाएका थिए ।

५० वर्ष माथिको पुरुषतर्फ जापानका मिजुकी मात्सुजुकी विजेता बने भने नेपालका राजेश महर्जन दोस्रो र रामकुमार रायमाझी तेस्रो भए ।

३५ वर्ष माथि पुरुषतर्फ दिनेश महर्जन प्रथम, सुनिल महर्जन दोस्रो र नवराज कार्की तेस्रो भए । खुला पुरुषतर्फ आयुष चाम्लिङ, सुनज विक र अभिनारायण अधिकारीले क्रमशः पहिलो, दोस्रो र तेस्रो स्थान हासिल गरे ।

महिलातर्फ ३५ वर्ष माथि उमेर समूहमा कल्पना महर्जन प्रथम, चारु अर्याल दोस्रो र उर्मिला शाक्य तेस्रो भए। ६५ वर्ष माथि पुरुषतर्फ जापानका नोरी हिकोवातान्ने विजयी भए भने नेपालका पुष्पलाल श्रेष्ठ दोस्रो भए । त्यसैगरी ७० वर्ष माथि पुरुष समूहमा मंगलदास तण्डुकार पहिलो र गजेन्द्र लाल प्रधान दोस्रो भए ।

विजयी खेलाडीलाई प्रमुख अतिथि किर्तिमानी धावक बैकुण्ठ मानन्धर र विशेष अतिथि बुद्धवीर लामाले पुरस्कार वितरण गरेका थिए ।