साफ यू–१७ महिला फुटबलः नेपाल आज बंगलादेशसँग भिड्दै

काठमाडौं । भुटानमा जारी साफ यू–१७ महिला च्याम्पियनसिप अन्तर्गत नेपाल आज आफ्नो तेस्रो खेलमा बंगलादेशसँग प्रतिस्पर्धा गर्न तयार भएको छ । खेल भुटानको चाङ्लिमिथाङ रंगशालामा नेपाली समय अनुसार साँझ ५ः४५ बजे सुरु हुनेछ ।

नेपाल र बंगलादेश दुवैले अहिलेसम्म दुई–दुई खेल खेलेका छन्, जसमा एकमा जित र अर्कोमा हार ब्यहोरेका छन् । नेपालले सुरुवाती खेलमा भारतसँग ७–० को फराकिलो हार खेपेको थियो भने दोस्रो खेलमा घरेलु टोली भुटानलाई २–१ ले हराएको थियो । बंगलादेशले भने पहिलो खेलमा भुटानलाई ३–१ ले पराजित गरे पनि भारतसँग २–० ले हार मान्नु परेको थियो ।

पछिल्ला वर्षमा बंगलादेश महिला फुटबलमा विभिन्न उमेर समूहमा निरन्तर प्रगतिशील देखिएको छ । अंकतालिकामा हाल भारत ६ अंकसहित शीर्ष स्थानमा छ भने तीन–तीन अंक हासिल गरेका नेपाल र बंगलादेश क्रमशः तेस्रो र दोस्रो स्थानमा रहेका छन् ।

आजै अर्को खेलमा भारत र भुटान आमनेसामने हुनेछन् ।

प्रतियोगितामा नेपाल, भारत, बंगलादेश र आयोजक भुटान गरी चार टोली सहभागी छन् । डबल राउण्ड रोबिन आधारमा सञ्चालन भइरहेको यस च्याम्पियनसिपमा सबैभन्दा बढी अंक बटुल्ने टोलीले उपाधि हात पार्नेछ ।