‘क्युँञित बू फुटसल कप २०८२’ साउन ३१ गते हुने

काठमाडौं । क्युँञित बू कल्याण कोषको आयोजनामा सुनुवार समुदायबीचको खेलकुद मैत्रीता सुदृढ गर्ने उद्देश्यसहित ‘क्युँञित बू फुटसल कप २०८२’ आगामी साउन ३१ गते शनिबार हुने भएको छ ।

प्रतियोगिता काठमाडौंको पेप्सीकोलास्थित रोयल नेपाल फुटसल मैदानमा बिहान ६ बजेदेखि सुरु हुनेछ । खेल ७–ए–साइड फुटसल नियमअनुसार सञ्चालन हुनेछ ।

आयोजकका अनुसार प्रत्येक टिममा ७ जना खेलाडी र ३ जना वैकल्पिकसहित १० जना सम्म खेलाडी सहभागी हुन सक्नेछन् । प्रतियोगितामा सुनुवार समुदायका युवा, संस्थागत टिमहरू तथा खेलप्रेमीहरूले सहभागिता जनाउन सक्नेछन् ।

विजेता टिमले ५० हजार रुपैयाँ नगदसहित ट्रफी, मेडल र प्रमाणपत्र प्राप्त गर्नेछ भने उपविजेतालाई ३० हजार रुपैयाँ नगदसहित ट्रफी, मेडल र प्रमाणपत्र प्रदान गरिनेछ ।

त्यस्तै, उत्कृष्ट खेलाडी र उत्कृष्ट गोलरक्षकलाई विशेष सम्मानस्वरूप ट्रफी प्रदान गरिनेछ ।

टिम दर्ता शुल्क ४ हजार रुपैयाँ तोकिएको छ भने इच्छुक टोलीहरूले साउन २५ गतेभित्र दर्ता प्रक्रिया पूरा गर्नुपर्नेछ ।

खेलकुदमार्फत युवाबीच सहकार्य, सद्भाव र सामाजिक एकता प्रवर्द्धन गर्ने उद्देश्यले प्रतियोगिता आयोजना गरिएको क्युँञित बू कल्याण कोषले जनाएको छ ।

विसं २०६२ मा स्थापना भएको ‘क्युँञित बू कल्याण कोष’ सुनुवार आदिवासी समुदायको क्युँञितिचा थरगत संस्था हो । संस्थाले समुदायको अधिकार, पहिचान र समुन्नतिको पक्षमा निरन्तर आवाज उठाउँदै आएको छ ।