स्पेनलाई २०१० पछि ऐतिहासिक सफलता, ओयाजाबालको दुई गोलमा अस्ट्रिया पराजित

काठमाडौं । स्पेनले फिफा विश्वकप २०२६ मा अस्ट्रियामाथि ३–० को प्रभावशाली जित निकाल्दै सन् २०१० पछि पहिलो पटक विश्वकपको नकआउट चरणमा विजय हासिल गरेको छ ।

शुक्रबार बिहान लस एन्जलस स्टेडियममा सम्पन्न खेलमा मिकेल ओयाजाबालले दुई तथा पेड्रो पोरोले एक गोल गर्दै स्पेनलाई सहज जित दिलाए । यो जितसँगै स्पेनले विश्वकपको अन्तिम १६ मा स्थान सुरक्षित गरेको छ, जहाँ उसले पोर्चुगल र क्रोएसियाबीचको विजेतासँग प्रतिस्पर्धा गर्नेछ ।

सन् २०१० को विश्वकप फाइनलमा नेदरल्यान्ड्सलाई पराजित गर्दै उपाधि जितेपछि स्पेनले विश्वकपको नकआउट चरणमा पहिलो पटक जित हात पारेको हो ।

स्पेनले पहिलो हाफभरि नै खेलमा पकड जमाएको थियो । २९औँ मिनेटमा मार्क कुकुरेलाले बल जाली चुमाए पनि स्पेनका खेलाडीले अस्ट्रियाका गोलरक्षक अलेक्जान्डर श्लागरलाई अवरोध गरेको ठहर गर्दै रेफ्रीले गोललाई मान्यता दिएनन् ।

त्यसपछि ३३औँ मिनेटमा ओयाजाबालको शक्तिशाली प्रहार श्लागरले उत्कृष्ट बचाउ गरे । तर ३६औँ मिनेटमा कुकुरेलाकै पासमा ओयाजाबालले गोल गर्दै स्पेनलाई अग्रता दिलाए । यो गोल स्पेनका लागि सन् २०१० को विश्वकप फाइनलमा आन्द्रेस इनेस्टाले गरेको गोलपछि विश्वकपको नकआउट चरणमा आएको पहिलो गोल पनि बन्यो ।

पहिलो हाफको इन्जुरी समयमा एलेक्स बाएनाको फ्रिकिक क्रसबारमा लागेर फर्किएको थियो भने त्यसपछि लामिन यामालले गरेको प्रहार पनि श्लागरले रोकेपछि स्पेनले अग्रता दोब्बर बनाउने अवसर गुमाएको थियो ।

दोस्रो हाफमा स्पेनले थप आक्रामक खेल प्रस्तुत गर्‍यो । ६६औँ मिनेटमा एलेक्स बाएनाको उत्कृष्ट क्रसमा पेड्रो पोरोले हेडमार्फत गोल गर्दै टोलीको अग्रता २–० बनाए । यो पोरोको अन्तर्राष्ट्रिय करियरको पहिलो गोल पनि हो ।

खेल सकिन एक मिनेट बाँकी रहँदा ओयाजाबालले व्यक्तिगत दोस्रो गोल गर्दै स्पेनको ३–० को जित सुनिश्चित गरे ।

दुई गोलसँगै ओयाजाबालले जारी विश्वकपमा आफ्नो गोल संख्या चार पुर्‍याएका छन् । उनले समूह चरणमा साउदी अरेबियाविरुद्ध पनि दुई गोल गरेका थिए । चार गोल र एक असिस्टसहित उनी गोल्डेन बुटको प्रतिस्पर्धामा बलियो दाबेदारका रूपमा रहेका छन् ।

गोल्डेन बुट दौडमा फ्रान्सका कप्तान किलियन एमबाप्पे र अर्जेन्टिनाका कप्तान लियोनल मेस्सी समान ६ गोलसहित शीर्ष स्थानमा छन् । नर्वेका एर्लिङ हालान्ड र इंग्ल्यान्डका कप्तान ह्यारी केनले पाँच–पाँच गोल गरेका छन् । फ्रान्सका उसमान डेम्बेले चार गोल र दुई असिस्टका कारण ओयाजाबालभन्दा अगाडि रहेका छन् भने ओयाजाबाल, ब्राजिलका भिनिसियस जुनियर र सेनेगलका इस्माइला सार समान चार गोल र एक असिस्टमा रहेका छन् । कम समय मैदानमा बिताएकाले ओयाजाबाल उनीहरूमध्ये अघि छन् ।