खिजीदेम्बामा हुने बहुजातीय सांस्कृतिक प्रतियोगिताको तयारी पूरा

खिजीदेम्बा (ओखलढुंगा) । ओखलढुंगाको खिजीदेम्बा गाउँपालिकामा बहुजातीय पहिचान, भाषा, संस्कार र सांस्कृतिक विविधतालाई उजागर गर्ने उद्देश्यसहित आयोजना हुन लागेको जातीय झाँकी प्रतियोगिता २०८२ को सम्पूर्ण तयारी पूरा भएको छ । स्थानीयस्तरमै सांस्कृतिक संरक्षण र प्रवर्द्धनलाई प्राथमिकता दिँदै यो कार्यक्रमलाई सामूहिक अभियानका रूपमा अघि बढाइएको आयोजकले जनाएको छ ।

खिजीदेम्बा गाउँपालिकाको आर्थिक सहयोग र नेपाल आदिवासी महासंघ समन्वय परिषद् खिजीदेम्बाको आयोजनामा सञ्चालन हुने उक्त प्रतियोगिता चैत २८ देखि ३० गतेसम्म खिजीदेम्बास्थित खिजीफलाटेमा आयोजना गरिनेछ । कार्यक्रममा कोशी प्रदेशका भौतिक योजना मन्त्री प्रदीपकुमार सुनुवार प्रमुख अतिथिका रूपमा सहभागी हुने कार्यक्रम तय गरिएको छ, जसले कार्यक्रमको महत्वलाई थप उचाइ दिने अपेक्षा गरिएको छ ।

प्रतियोगितामा विभिन्न जातीय समुदायले आफ्ना मौलिक कला, संस्कृति र परम्परालाई झल्काउने नृत्य तथा प्रस्तुति दिनेछन् । सुनुवार समुदायले ‘शाँदर शील’ नृत्य प्रस्तुत गर्नेछ भने शेर्पा समुदायले ‘स्याब्रु’ नृत्यमार्फत आफ्नो सांस्कृतिक पहिचान प्रस्तुत गर्नेछ । त्यसैगरी तामाङ समुदायले ‘डम्फु गीतमा नृत्य’, मगर समुदायले ‘मारुनी’, गुरुङ समुदायले ‘कौडा’ तथा भुजेल समुदायले ‘उधौली–उभौली’ नृत्य प्रदर्शन गर्नेछन् । नेवार समुदायको ‘लाखेरलठ्ठी नाच’ पनि कार्यक्रममा विशेष आकर्षणको रूपमा रहनेछ ।

यस प्रतियोगिताले विभिन्न समुदायबीच आपसी सद्भाव, सहकार्य र सांस्कृतिक आदान–प्रदानलाई बलियो बनाउने विश्वास लिइएको छ । स्थानीय तहमा यस्ता कार्यक्रमले पर्यटन प्रवर्द्धनका साथै नयाँ पुस्तालाई आफ्नै मौलिक संस्कृतिप्रति जागरूक बनाउने अपेक्षा गरिएको छ ।

आयोजकका अनुसार, खिजीदेम्बालाई सांस्कृतिक विविधताको केन्द्रका रूपमा स्थापित गर्दै समृद्ध गाउँपालिका निर्माणमा यस्ता गतिविधिहरू महत्वपूर्ण हुनेछन् । प्रतियोगिताले स्थानीय कला र पहिचानलाई राष्ट्रियस्तरसम्म पुर्‍याउने अवसर सिर्जना गर्ने विश्वास समेत गरिएको छ ।