उपत्यकामा चिसोको प्रभाव बढ्दै, तापक्रम लगातार ओरालो

काठमाडौं । काठमाडौं उपत्यकामा पछिल्ला दिनहरूमा चिसो बढ्दै गएको छ । न्यूनतम तापक्रम निरन्तर घटिरहेकाले बिहान र बेलुकाको समय अझ बढी चिसो महसुस हुन थालेको छ ।

मौसम पूर्वानुमान महाशाखाका अनुसार आज बिहान ५ः४५ बजे काठमाडौंको न्यूनतम तापक्रम ३.४ डिग्री सेल्सियस मापन गरिएको छ । यो प्रारम्भिक तथ्याङ्क मात्र भएकाले बिहान ८ः४५ बजे गरिने आधिकारिक मापनमा तापक्रम अझै घट्न सक्ने सम्भावना रहेको महाशाखाले जनाएको छ ।

यसअघि सोमबार काठमाडौंको न्यूनतम तापक्रम ३.५ डिग्री सेल्सियस र आइतबार ४ डिग्री सेल्सियस रहेको थियो । यसले उपत्यकामा चिसो क्रमशः बढ्दै गएको संकेत गर्छ ।

अधिकतम तापक्रमतर्फ हेर्दा सोमबार १५.३ डिग्री सेल्सियस र आइतबार १५.७ डिग्री सेल्सियस मापन गरिएको थियो । दिनको समयमा घाम लागे पनि बिहान र साँझ चिसो कायमै रहने देखिन्छ ।

मौसम महाशाखाले काठमाडौंसहित देशका विभिन्न स्थानमा दैनिक रूपमा तापक्रम मापन गर्दै आएको छ । न्यूनतम तापक्रम बिहान ८ः४५ बजे र अधिकतम तापक्रम साँझ ५ः४५ बजे मापन गरिन्छ । दिनभरि सबैभन्दा कम पुगेको तापक्रमलाई न्यूनतम र सबैभन्दा बढी पुगेको तापक्रमलाई अधिकतम तापक्रम मानिन्छ ।